ALAS dos sa hapon. Nalingaw paghimo og ‘finishing touches’ sa iyang gidibuho nga ‘portrait’ si Ramil. Usa ka gamayng luna sa ‘lobby’ sa Green Meadow Mall ning dakbayan, ang gigahin nga mahimo niyang galeriya. May abangan siya sa maong puwesto, apan usa ka dakong advertising firm ang mitubag sa maong abangan matag bulan. Marinas Advertising ang esponsor niya. Bugti sa maong pabor modibuho siya sa mga konsepto sa mga ‘commercial advertisement’ nga isangon kaniya. Libre. Kaya niya ang trabaho, busa nalingaw ra siya. Dili mangayo og bahin ang kompaniya sa iyang kita gikan sa mga kustumer nga magpadibuho bisag unsa. Ulitawo pa siya ug ‘self-supporting’ sa kurso nga Architecture.
May miduol nga tiguwang lalake.
“Dong, pwede ba ni nimo ma-drowing? Ipadako ang ‘frame’ nga 2 feet by 3 feet!” sa tiguwang nga nagpakita og litrato sa usa ka batan-ong lalake; 2x2 ang gamayng litrato.
Giurongan ni Ramil ang iyang gibuhat. Gikuha niya sa kamot sa tiguwang ang litrato. Gitutokan niya. Guwapo ang lalake nga naa sa litrato. Puwede nga mahimong igsuon ni Gabby Concepcion o kaha ni Bong Revilla. Giguwapohan gyud si Ramil sa lalake nga diha sa litrato.
“Puwede kaayo ni, Sir,” ni Ramil nga miyahat sa tiguwang nga nagbarog sa iyang atubangan.
Mipahiyom ang tiguwang; nagpakitag kahimuot.
“Imong anak ni, Sir?” ni Ramil.
“Oo. Ang ‘portrait’ akong iregalo niya sa umaabot niyang birthday,” tubag sa tiguwang. Setintahon ang iyang hitsura. Nipis na ang buhok nga puro na puti, ug ‘crew cut’ ang iyang tupi.
“Kanus-a ang birthday niya, Sir?” ni Ramil.
“Karong Disyembre unse,” sa tiguwang.
“May panahon pa, Sir. Igo-igo gyung nahuman nako og ‘pencil drawing’. Black and white man kaha ang imong gusto, Sir.”
“O, black and white man sab ang hulagway.” sa tiguwang, unya mipadayon, “Pila man diay ka buwan usa mahuman nimo ang ‘portrait?”
“Usa ka semana, human na kana, Sir. Kon augdan nako dayon. Apan ‘first come-first-served’ man akong mga kustomer. Daghan pa mang nahauna nimo. Agusto man ron, Oktubre pa nako na mahuman. Busa, unang semana sa Nobiyembre puwede na makuha nimo,” ni Ramil.
“Pila akong bayranan?” sa tiguwang.
“Kining gidak-una, usa ka libo ka pesos. Modawon kag katunga,” ni Ramil.
NOBIYEMBRE 5 dihang nahibalik ang tiguwang sa galeriya. Gidispley na ni Ramil ang gipatrabaho sa tiguwang. Misidlak ang mga mata niini ug nagpahiyom nga nagtan-aw sa dako nga kuwadro. “Maayo gyud nimong pagkatrabaho, Dong. Salamat kaayo!” sa tiguwang nga mitunol og tibuok usa ka libo ka pesos ngadtong Ramil. Gidawat ni Ramil ug mikuot sa pitaka aron pagsukli.
“Keep the change, Dong. Nahimuot kaayo ko sa resulta,” sa tiguwang.
“Salamat, Sir!” ni Ramil. Giputos niya ang kuwadro ug gihatag sa kustomer.
“Pila nay edad sa imong anak, Sir?”ni Ramil.
“Ha? Ah, eh!” sa tiguwang nga nagpasiklap kang Ramil ug sa gamayng litrato nga giuli kaniya, “Bayinte singko!”
“Daan na man lagi ang litrato, Sir. Morag milalag na!” ni Ramil.
Nakapanglad-ok og laway ang tigulang nga miingon, “Ato ra ni, ha? Ako bitaw ning nia sa litrato. 25 pa akong edad pagkuha ini. Apan wa gyud ko guwapuhi. Karong tiguwang na ko nakit-an ni nako sa karaang album. Giguwapuhan na man ko. Mao nga ako ning gipatrabaho nimo. Regalo nako sa akong kaugalingon sa ika-70 nga sumad sa akong adlawng natawhan. Isurprisa nako sa akong mga anak ug apo.” Ug mitalikod dayon ang tiguwang dala ang iyang kuwadro.
“Na, hala. Happy birthday diay, Sir! ni Ramil.
Wala na makadungog ang tiguwang. Gisugdan na lang niyag tan-aw ang bukobuko niini. Nakahinuktok si Ramil. “Naa diay tawo nga ingon niana!” Nakatuaw siya sa hilom. (KATAPUSAN)