GIKAN kang Irene Fernando sa GMA 7 corporate communication office, akong nasayran nga ang mga artista sa tulo ka mga teleserye sa network (Family History, Prima Donnas ug The Better Woman) mobisita sa Cebu karong adlawa ug ugma.
Sila si Dawn Zulueta, Michael V ug Mikoy Morales ang mga bida sa Family History samtang sila usab si Katrina Halili ug Wendell Ramos ang sa Prima Donnas.
Atong masayran kon sila bang tanan ang mobisita o duna pa bay laing madugang inig tungtong nila sa tablado sa Gaisano Grand Mall Mactan sa Lapulapu City karong alas 4 s.h.
Sa alas 10 s.b., makigkukabildo si Michael V sa Balitang Bisdak alang sa Masterclass Series. Anha kini sa Parklane Hotel pagahimoon.
•••
Ugma, ang mga artista sa The Better Woman pinangulohan nila ni Andrea Torres ug Derek Ramsay ang makig-bonding sa ilang mga magdadayeg didto sa South Town Centre sa Talisay City sa alas 4 s.h.
Seguradoa nga duol mo sa tablado inig pasundayag na sa mga artista. Mas duol, mas taas ang kilig. Anà!
•••
Sa sunod semana, ang mga bida sa pelikulang Hello, Love, Goodbye nga sila si Kathryn Bernardo ug Alden Richards na usab ang mopakilig sa mga taga Cebu ug silingang dapit.
Sa pagsulat nako niini, wa pa maklaro kon asa ang mall show sa duha. Batasana lang gyud ang pagbasa sa Super Balita aron ma-updated sa mga kalihukan sa syobis.
Gitakdang ipasalida ang pelikula sa Star Cinema sa mga sinehan sa tibuok nasud sugod sa Hulyo 31.
•••
Nipahibalo sab si Chiqui Lastiere sa Viva Films nga isalida na ang pelikulang Indak nga gibidahan sa gitawag nga total performer nga si Sam Concepcion ug sa 2019 Gawad Urian ug Famas best actress nga si Nadine Lustre.
Sa Agosto 7 na kini isalida. Sa Agosto 6, mobisita sa Cebu ang duha ka artista.
•••
Sa pagsulat nako niini, duha ka mga maanyag nga higala ang akong nahibaw-an nga niapil sa bag-ong bangga sa kaanyag, ang Mrs. Cebu Philippines: sila si Cheryl Pelayo-Dacua nga napiling runner-up sa Ms. Cebu kanhi ug ang magpapatigayon nga si Aida Patana. Bongga!