LAYO pa kaayo ang sunod eleksiyon apan naa nay hisgut og kinsay mag-atbang sa 2022. Gihisgutan na kuno ang Mike Rama pagka-mayor paris kang Konsehal Raymund Garcia ubos sa Barug Team Rama. Kining akong impormasyon nga gikan sa usa ka kasaligang tinubdan mipalig-on sa mga tabi-tabi nga modagan gayud sa pagka-mayor si Rama batok kang incumbent mayor Edgar Labella. Dili pa tingali makadawat si Rama nga bise mayor lang kay dugay baya siyang nakumbinser nga mag-bise nalang kang Labella. Suma sa usa ka napilding konsehal nga tungod usab kini sa pagtukmod sa iyang mga dumadapig nga sila gayud maoy angayang mohari sa city hall. Wala man gud maka-arte ang mga tawo ni Rama batok sa mga Labella supporter.
Apan nakapangutana ang kanunay nga nagsunod sa pamulitika sa Cebu City nga si Pat “Fiscal” Navarro kon misugot na ba si Konsehal Raymond Garcia sa maong tándem. Nasayud siya kon unsa kasuod si Mayor Labella ug Garcia. Mura usab og managsuon sila si Presidential Assistant for the Visayas (OPAV) Secretary Mike Dino nga maoy padrino ni Labella ngadto sa Partido Demokratiko Pilipino – Lakas ng Bayan (PDP-Laban) ug ngadto kang Presidente Rodrigo Duterte. Wala usab masayud sa maong kaugmaran si kanhi Cebu City Mayor Alvin Garcia, amahan ni Konsehal Raymond. Miingon hinuon siya nga iyang lig-unon ang partidong Kugi Uswag Sugbo (Kusug) nga mahimong ika-upat nga partido sa dakbayan Sugbo uban sa PDP-Laban, Barug Team Rama ug BOPK.
Sa laing bahin, anaa usay tabi-tabi nga ang Bando Osmena – Pundok Kauswagan (BOPK) magpadagan gayud og kandidato karong 2022. Sumala sa ubang líder sa maong partido nga ilang kumbinsihon si kanhi konsehal Margot Osmena sa pagdagan pagka-mayor. Kon mubalibad kini ilang pugson si Kongresista Bebot Abellanosa nga maoy molansar batok kang Labella. Ilang gituhoan nga kon mag-atbang sila si Labella ug Rama pagka-mayor mabuak ang ilang mga sumosunod nga maghatag kini og dakung kahigayunan sa BOPK pag-ilog pagbalik sa city hall.
•••
Padayon pa diay ang smuggling diha sa Port of Cebu? Dunay impormasyon nga miabut kanako nga adunay tulo ka mga vans ang gipugngan karon sa Cebu Customs nga gidudahang may sulod nga mahalong mga sakyanan kadaghanan niini mga sportscars. Ang una kuno niining maong mga sakyanan napalusot na pinaagi sa pagpadagan niini panahun sa kagabhion nga gi-gwardiahan og armadong mga tawo. Sumala sa akong tinubdan nga mga inilang tawo maoy nagpalusot niini. Ambut og tinuod ba nga kini maoy sitwasyon sa mga distrito sa Customs sa tibuok nasud. Kini tingali maoy katarungan nganong daghang gitangtang ni Presidente Duterte nga mga opisyal sa Bureau of Customs. Apan ang nakabati kay, sumala pa, ang nagpalusot mao man kining mga smuggler kaniadto nga karon gipaluyohan na sa gamhanang mga tawo sa gobiyerno. (mannyrabacal1144@yahoo.com)