Barrita: 27M ka estudyante panalipdi

GIDEKLARAR sa Department of Health (DOH) ang usa ka national dengue alert niadtong Lunes tungod kay labing menos 450 na ka mga tawo ang napatay sa dengue, lakip sa usa ka batang masuso ug usa nga nagpangedaron nag usa ka gatos, gikan sa Enero 1 hangtod sa Hunyo 29 ning tuiga.

Si Health Secretary Francisco Duque III niingon nga mao kini ang labing unang higayon nga gideklarar nila ang usa ka national alert aron masayod ang publiko sa pagkatap sa dengue nga nitala na og 106,630 ka mga kaso sa tibuok nasod sa giasoy nga panahon.

Wa pay national epdemic, matod niya, apan nisaka og 85 porsento ang mga kaso sa dengue kon ikomparar sa samang panahon sa miaging tuig.

•••

Ang DOH nilusad niadtong Abril 2016 sa usa ka immunization program, ginamit ang Dengvaxia vaccines, sa mga Grade 4 public school pupils sa tulo ka rehiyon. Kapin sa 700,000 ka estudyante ang nabakunahan.

Apan gihunong kini niadtong Disyembre 1, 2017, tulo ka adlaw human nipahibawo ang Sanofi, ang naghimo sa Dengvaxia, nga nigrabe ang dengue sa nabakunahan apan wa pa matakbuyi niini. Niabot sa 14 ka mga batang nabakunahan ang namatay. Di makasulti ang DOH kon ang Dengvaxia ba ang hinungdan niini.

Apan karon nga wa nay bakuna, unsa man ang buhaton? Gub-on ang pangitlogan sa lamok, magsul-ob og protective clothing, magpatambal dayon kon tagbuyan sa dengue ug mosugot sa fogging kon dunay dengue outbreak.

•••

Si Senate President Pro Tempore Ralph Recto nisugyot nga butangan og screen ang pultahan ug bentana sa tanang pagatukoron nga mga public classrooms aron maproteksyonan ang 27 milyones ka mga estudyante sa tibuok nasod.

Sa laktod di paeskuylahon ang mga lamok kay di man sila pasudlon sa classroom. Ang Rotary Club of Metro Cebu adunay kampanya sa pagpatay sa mga larva sa lamok nga nagdala sa dengue sa mga lim-aw palibot sa mga eskuylahan sa Central Visayas.

Kon mamatay na ang lamok samtang larva pa, di na sila makalupad ug di na makasud pa sa mga classroom.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph