ADUNA nay 25 ka units sa e-jeep ang nagdagan sa dakbayan sa Lapu-Lapu. Aduna pay laing 75 units nga coming. Tipik ug kabahin kini sa upgrading ug modernization program sa kagamhanan sa mga public utility vehicles. Unya environmentally friendly ang maong nga sakyanan kay gipadagan pinaagi sa electronic nga di na mobugwak og aso kay di gasolina o krudo ang gipatubil. Usa ka kooperatiba sa mga kanhi tricycle drivers ug operators ang nagpadagan niini.
Apan ipa-review ni Mayor Junard “Ahong” Chan ang rota sa mga e-jeep ug posible nga iyang babagan ang umaabot nga 75 units. Kay una, naka-apekto sa panginabuhi sa mga tricycle ug multi-cab drivers. Ikaduha, nakahatag og dugang problema sa dagan sa kahuot sa trapiko sa iyang dakbayan. Ikatulo, walay klarong rota ug magbiyahe sa bisan asang lugar sa dakbayan.
Kon mao lang kini ang problema ni Chan hinungdan nga iyang supakon ang dugang mga units sa e-jeep, mapangitaan ra man kini og solusyon. Ang mga e-jeep gyud kaha ang hinungdan sa grabeng traffic nga nasinati sa dakbayan? Dili kaha ang mga tricycle ang hinungdan? Kon traffic ang problema, nganong tugutan man nato nga makabiyahe ang tricycle sa national roads? Gidid-an man gyud na sila. Adto lang sila sa barangay roads.
Kon naapektuhan ang tricycle ug multicab drivers sa pagpadagan sa mga e-jeep, nganong dili man dasigon sila nga moapil sa kooperatiba aron mo-level up usab sila? Mga kanhi tricycle ug operators ang nagpadagan sa mga e-jeep. Magpabilin ba lang ta ingon niini ang matang sa atong mga pampublikong sakyanan hangtod sa hangtod kay nabalaka kita nga adunay maapektuhan nga sektor?
Nganong dili man usab pangutan-on ug konsultahon ni Chan ang mga sumasakay kon hamugaway ba sila o dili sa pagsakay sa e-jeep? Kon nakahatag ba kini nila og kaayuhan? Kon nakahatag kini sa kinabag-ang duot sa sumasakay, kinsa man ang palabihon ni Mayor Chan, ang mga apektadong tricycle drivers o mga sumasakay? Apan unsa ka tinuod ning among nadunggan usab nga operator si Chan og multicab units ug gasoline stations? Kon tinuod ni, aw, adunay conflict of interest sa iyang desisyon. Kanang e-jeep dili ra ba mogamit og gasolina. (bobbygnalzaro@gmail.com)