Editoryal: Hinaut madayon na

Editorial Cartoon by John Gilbert Manantan
Editorial Cartoon by John Gilbert Manantan

GIPANEGURO ni Presidential Assistant for the Visayas Secretary Michael Dino nga masugdan na sa di pa matapos ang 2019 ang imprastraktura alang sa Bus Rapid Transit (BRT). Apan mausab ang rota kay di na kini moagi sa Mambaling, kon di sa South Road Properties (SRP).

Giingon niya nga hagip-ot ang karsada sa dapit ug nagkinahanglan na og dugang pundo kon ipamugos kini. Gawas hinuon niini, wa nay kausaban pa.

Kadugay na gihisgutan ang BRT nga sugdan. Target unta gani nga mahuman kini sa 2018. Hapit na lang usab matapos ang 2019, wa pay nasugdan.

Mao bitaw nga ang Pilipinas naglisod sa paglambo ug naunhan na lang sa ubang mga nasod nga backward kaayo, sama sa Vietnam, kay magsige lang og lalis ang mga pulitikanhong lider. Lainlain ang mga plano ug prayoridad nga mga proyekto.

Kon mahuman na ang usa ka termino sa namunoan ug molingkod ang lain, kasagaran sa mga proyekto di pangtiwason. Pangitaan pag buslot ug sayop aron lang kini mahunong, labina kon iya kini sa kaatbang.

Nasusama og alimango ang mga lider nga nagbinitaray padung sa ubos, hinungdan nga naghingal ang nasod sa paghaw-as gikan sa kalisdanan.

Hinaut pa nga kining BRT karon mapatuman na uban sa lain pang sistema sa pampublikong transportasyon aron mahaw-as na usab ang mga Sugboanon sa kalbaryo sa karsada nga giantos gikan sa yanong mga lumolupyo ngadto na sa labing adunahan.

Kon tinuod ang bana-bana sa pagtuon, binilyon ka pesos ang alkanse o nawala nga kita tungod sa trapiko. Kana diayng P17 bilyunes nga gahin sa BRT, pudyot ra diay na sa alkanse sa Sugbo. Barato ra diay kaayo na kon itandi sa kadaut nga namugna sa kahuot sa mga sakyanan.

Busa, nganong langaylangayon pa man ang proyekto nga dugay na kaayong giplano kon mao kini ang tambal sa problema?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph