Garin Farm tatak Ilonggo

SA MGA laagan nga nangita og dapit nga maghatag og kalinaw sa huna-huna ug pagbate dungan sa kalingawan, atong suroyon ang anam na nga nahimong inila sa dakbayan sa Iloilo, Garin Farm Pilgrimage Resort.

Ang city of Iloilo nga usa na ka highly urbanized city nga nahimutang sa habagatang-silangang bahin sa Panay Island diin ilado sab ang maong dapit sa ilang Spanish colonial churches ug karaang balay.

Budget tips

Akong tip sa mga nagdaginot pahimusli ang mga airline promo fare kay kining akong pagsuroy sa maong dapit nigasto lang og P1,800 back and forth nga nanukad sa Sugbo.

Dili mabalaka sa inyong accommodation kay daghan sa maong siyudad ang affordable ug hamugaway nga nga hotels nga one-tip away lang sa pag-search diha sa inyong mobile gadgets gamit ang tour apps.

Kon pagkaon ang hisgutan wa ug tuo naay daghang kapilian nga barato.

Garin Farm

Sa akong duha ka adlaw nga pagduaw sa Iloilo una kong gisuroy ang Garin Farm Pilgrimage Resort nga nahimutang sa San Joaquin.

Sa kadtong wa pa makasuroy sa maong dapit mangangha kamo sa kanindot sa kinaiyahan nga naglibot niini gawas nga pilgrimage ang area nag-offer sab ang Garin Farm og mga outdoor sports o activity sama sa kayaking, swimming ug zipline.

Bisan pa tuod nga milabay na ang semana santa ang lugar haom kaayo niadtong buot maghinuklog sa ilang tagsa-tagsa ka mga kaugalingon o soul searching.

Gawas sa pleasure, exercise na sab ang pagsaka sa 456 ka mga ang-ang sa konkreto nga hagdanan diin nahimutang sab ang mga misteryo alang niadtong nag-ampo og rosaryo.

Usa sa highlight sa mao ang higante nga krus ug adunay langob nga mamahimo kang mosuong ug sa unahan nga bahin imo nang masud-ong ang kahayag.

Sa imong paglugwa gikan sa mangitngit nga kuweba mosugat kanimo ang “heavenly-like” nga area kansang mga monumento nga mga angel pulos puti.

Ang labing dako nga estatuwa o monumento mao ang Santisima Trinidad.

Entrance Fee

Adunay P150 matag tawo ang entrance fee sa Garin Farm diin mapahimuslan mo na ang farm lakip na ang pilgrimage hill apan sa ubang kalingawan adunay separate nga bayranan.