MGA lumolupyo sa Mandaue City giawhag nga mag-backyard composting aron adto ilabay ang basura nga malata kun madunot.
Usa kini sa mga gilaraw sa siyudad aron mamenosan usab ang mga basura ilabi na sa pagdili na sa Siyudad sa Sugbo sa pagpalabay sa dakbayan ug basura ngadto sa Binaliw landfill.
Giawhag sa Department of General Services sa Siyudad sa Mandaue ang mga lumolupyo nga mogamit na og backyard composting inay nga mohuwat pa sa mga collector sa basura una pa kini ilabay.
Matod sa pangu sa Department of General Services, Marivic Cabigas, maghimo nalang sila og mga alternatibo nga pamaagi aron mamenos menosan ang mga basura sa syudad ilabi na nga gidid-an na ang dakbayan nga molabay sa Binaliw landfill.
“Mao man gyud na ang gihangyo ni Mayor unta pero hinuon karon sa ARN (Binaliw landfill) gihapon mi. Mao na mao man na ilang (Cebu City) desisyon, magtinabangay na lang gyud mi,” matod ni Cabigas. (ANV)