Mga NPA bombahan og basic services

LIVELIHOOD PROGRAM: Usa sa mga plano sa kagamhanan mao ang pagbansay sa mga lumolupyo sa mga dapit nga gilubloban sa mga komunistang rebelde og livelihood program. (File)
LIVELIHOOD PROGRAM: Usa sa mga plano sa kagamhanan mao ang pagbansay sa mga lumolupyo sa mga dapit nga gilubloban sa mga komunistang rebelde og livelihood program. (File)

INAY gubaton gamit ang pwersa sa militar ug kapulisan, bombahan sa batakang mga serbisyo sa gobiyerno ang mga lugar nga gilubluban sa mga rebelde sa Central Visayas.

Si Presidential Assistant for the Visayas Michael Dino nipahibawo niini atol sa Regional Convergence Workshop sa Ending Local Communist Armed Conflict (Elcac) niadtong Huwebes, Hulyo 18, 2019 sa Oakridge IT Center 2.

Sa tuig 2021, tinguha sa Elcac nga mahimo nang insurgency-free o wala nay rebeldeng pundok ang Central Visayas labi na sa 15 ka mga barangay sa unom ka mga munisipalidad sa lalawigan sa Negros Oriental nga wala nganli ni Dino.

Sa iyang pakigpulong, sumala ni Dino aron makab-ot ang kahusay ug kalinaw, dili lang ang pakiggubat sa mga teroristang grupo ang buhaton aron kini ma-neutralize, kondili ang “whole-of-nation approach” pinaagi sa paghatag sa ilang panginahanglan nga batakang mga serbisyo sa sayon ug kasaligan nga pamaagi.

Apil niini ang socialized housing o ang paghatag sa kagamhanan og mga luna ngadto sa mga rebelde nga mobalik sa sabakan sa gobiyerno pinaagi sa land reform, scholarship sa kabataan, patubig, pagbansay sa Technical Education and Skills Development Authority (Tesda) sa mga benepisyaryo sa ilang panginabuhian ug uban pa.

“So, there is no more reason why nganong dili sila manaog sa bukid. Because honestly speaking the only people katong dili manaog ba, mangitag rason, wala na ni silay ideology kaning mga tawo nga di pa gyud mobalik nato...So what else do they want, aside from exorting money from the businessmen,” pahayag ni Dino sa press conference.

Si Leocadio Trovela, director sa Department of Interior and Local Government (DILG) 7, namahayag nga ubos sa Enhanced Comprehensive Local Integration Program (E-CLIP), ang mga kanhi rebelde nga motahan sa gobiyerno kay hatagan og P50,000 nga livelihood assistance, P15,000 nga immediate assistance ug modoble ang tabang pinansiyal kon dunay armas nga i-surrender og apil.

Si National Intelligence Coordinating Agency (Nica) 7 retired Police Major General Augusto Marquez Jr. positibo nga makab-ot ang tinguha sa Elcac nga mahimong insurgency-free ang Central Visayas sa 2021.

Siya nipasabot sa miaging 12 ngadto sa 15 ka tuig, niabot og 115 ka mga barangay ang apektado sa mga rebelde. Karon, naa na lang sa 15 ka mga barangay.

Siya nidugang kaniadto, pito ka guerillas ang naglihok sa Bohol, lima sa Sugbo ug pito sa Negros Oriental. Karon, tulo na lang sa Negros Oriental ug gideklarar na nga insurgency-free sa Sugbo, Bohol ug Siquijor.

Si Major General Dinoh Dolina, commander sa 3rd Infantry Division sa Philippine Army sa Central Command sa Armed Forces of the Philippines (AFP) nibutyag nga 341 ka mga rebelde na lang nga naglangkob sa tulo ka fronts, ang Central Negros Front 1, Central Negros Front 2 ug ang nagkahinay nga pundok sa habagatang-silang, ang naglihok sa Negros Oriental.

Matod niya, nabalik sa Central Visayas ang duha ka Infantry Batallion sa Philippine Army gikan sa Mindanao. Ang 15th IB gibutang nila sa unom ka apektadong mga lungsod sa Negros Occidental kun gitawag og Chicks (Candoni, Hinoba-an, Ilog, Cauayan, Kabankalan ug Sipalay). Samtang ang 11th IB sa Negros Oriental alang sa dugang pwersa sa usa ka batallion.

4 patay sa ambush

Upat ka mga pulis ang nangamatay sa ambush sa mga NPA sa sitio Ilaya Yamot, Barangay Mabato, lungsod sa Ayungon Negros Oriental alas 2:30 sa hapon, Hulyo 18.

Sa spot report nga gipadangat sa Ayungon PNP nga samtang nag-angkasay sa duha ka mga motorsiklo ang upat ka mga pulis nga wa lang una nganli sa kapulisan, kalit lang sila gipamusil sa dihang duol na sila sa balay sa usa ka Otto Anadon sa sitio Ilaya Yamot, Barangay Mabato.

Ang mga biktima nakaangkon og mga pinusilan sa nagkadaiyang bahin sa ilang kalawasan gikan sa wa pa matino nga kalibre sa armas.

Samtang ang mga sakop sa communist terrorists dali nga misibat paingun sa kakahuyan sa maong lugar. (dugang ni AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph