SA MAKAUSA pa, personal nga motan-aw si Floyd Mayweather Jr. sa away ni Manny Pacquiao karong Hulyo 20 (Hulyo 21 sa Pilipinas) batok ni undefeated Keith Thurman didto sa Las Vegas, Nevada.
Kini maoy gikompirma ni Leonard Ellerbe ang chief sa Mayweather Promotions kinsa mibutyag nga anaa sa ringside sa MGM Grand Garden Arena atol sa maong away.
Dili bag-o alang ni Mayweather ang pagtan-aw sa mga away ni Pacquiao didto sa US. Linawas usab siya nga misaksi sa dihang gipildi sa fighting senator si Jessie Vargas didto sa Thomas & Mack Center niadtong 2016 ug ingon man Adrien Broner niadtong Enero sa MGM Grand.
Gani mihapit siya sa dressing room ni Pacquiao sa wala pa ang away niini batok ni Broner. Ang duha ka higpit nga karibal sa boxing, kon kahinumdoman, nagkita usab atol sa duwa sa Los Angeles Clippers didto sa Staples Center pipila ka adlaw human sa away ni Pacquiao ug Broner.
Sa nasayran, si Pacquiao nagtinguha nga makig-rematch ni Mayweather human kini mapildi niadtong 2015 sa ilang away nga maoy pinakadako og kita sa kasaysayon sa boxing sa tibuok kalibutan.
Sa maong away, wa makabuylo si Pacquiao tungod sa injury sa iyang abaga.
Apan bisan pa sa hagit, daw og sa nakontento na si Mayweather sa iyang pagretiro ug wala pay timailhan nga mobalik pa kini og saka sa ring.
Ang katapusang niyang away natigayon niadtong 2017 pinaagi sa pag-knockout sa star fighter sa UFC nga si Conor McGregor.
“Let him enjoy his retirement,” matod ni Pacquiao ngadto sa mga media sa iyang paghiabot kagahapon didto sa Vegas.