SUPERBALITA DAVAO

Compio: Panaghigalaay

Tipik sa Kagahapon

SUBLING gipukaw akong panumdoman gikan sa dise-otso ka tuig na ang milabay uban sa akong apuhan samtang sakay kami sa barko nga Super Ferry 8 gikan Davao City padung sa Metro Manila.

Kay duha ka gabii ug tulo ka adlaw ang biyahe diha gyo’y imong mga mahimamat nga sa pagligad sa mga takna, imong masuginlan sa kaagi sa imong kinabuhi.

Nabanhaw kining tanan sa among pagsakay og barko sa miaging adlaw uban sa akong suod nga higalang si Allyson gikan sa Tagbilaran City sa Bohol padung sa Larena, Siquijor Island sa Central Visayas Region.

Sakay kami sa Lite Ferries, ang barko nga padung sa Plaridel, Misamis Occidental sa Northern Mindanao, diin sa among pagsulod palang, mibanhaw na sa akong panumdoman ang akong apohan nga mipanaw na.

Sa paglingkod namo ni Allyson sa bangko diin dunay numero nga mao sab ang numero sa among ticket, natingala siya ug namulong nga mahulagway daw sa akong nawong ang paghandom sa nangagi.

Giingnan nako siya sa among kagahapon ni lola, sa nag-edad pako og kinse anyos sa unang pagtaak nako sa Manila.

Misamot akong paghandom dihang among nakaila si Nanay Ising, 61-anyos nagdala sab siya sa iyang apo. Parihas kami og naugan didtos Larena Port.

Lingaw sab nga misaysay si Nanay sa iyang kaagi, nga susama sab sa akong kaagi uban sa akong apohan niadto.

Ang tanan nga daw pagbalik sa kagahapon niadtong mga taknaa, nasanapan sa mga pahiyom dihang amoa sab nga nahimamat ang among mga katupad sa lingkuranan ug sa mga cabin deck.

Usa na niini si Albert, 19-anyos, taga Plaridel, MisOr. Mouli siya sa ilaha kay sa Agosto pa ang pag-abli sa ilang klase, nagtungha siya sa usa ka tunghaan sa koliheyo sa Mandaue City, sa Cebu.

Managhigala na kami sud lamang sa tulo ka oras nga biyahe, apan sa pagnaug namo sa Larena Port, alas 11 sa gabii, daw gibati nako ang kamingaw sa among mga nahigala sa maong biyahe.

Hinuon sa among mga nahigala, nahigala sab namo sa Facebook hinungdan nga bisan sa unsang orasa mahimamat namo sila pinaagi sa social media.

Alegre karong mga panahona kay dali na lamang nato sila makontak gumikan sa teknolohiya nga maoy hinungdan nga maibanan ang atong mga kabalaka ug madugangan ang atong kasadya sa panaghigalaay.

Sa umaabot nga Agosto, subli kaming magkita sa akong nahigalang si Albert didto sa Mandaue City.

Sunod Biyernes mga higala, atangi ang akong pag-tsika sa among laag sa Siquijor Island nga gitawag nga “Mystic Island” gumikan sa mga misteryo nga hatud sa maong lugar gikan niadto hangtud ning kasamtangan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph