ARAKAN, North Cotabato -- Grupo sa Guerilla Front Committee 53 sa New People’s Army (NPA) ang gitudlong suspek sa pagpamusil sa duha ka sundalo alas 3:20 sa hapon niadtong Miyerkules, Hulyo 17, sa probinsiya.
Giila ang mga napatay nga sundalo nga sila Private (Pvt.) Lendo Borja ug Pvt. Jame Paul Devara, mga sakop sa 19th Infantry Battalion, Philippine Army.
Sa taho gikan sa 901st Brigade, nasayran nga gikan ang mga biktima sa usa ka community support program sakay sa motorsiklo sa diha nga gibanhigan sa mga NPA sa Sitio Bukatol, Barangay Kinawayan sa nahisgutang lungsod.
Nakahimo pa unta og balos sa pagpabuto ang mga biktima gamit ang ilang mga pusil, apan sa kadaghan sa mga NPA nalupig sila.
Human mapatay, gipangkuha sa mga rebelde ang mga armas nila Borja ug Devara ug miipsot paingon sa hilit nga dapit sa Brgy. Kinawayan.
Gilutos sa 19th IB ug kapulisan ang NPA nga namanhig sa mga biktima. (Edgar E. Fuerzas)