NAKATALA ang Department of Health (DOH)-Davao og 1,069 kaso sa tipdas sa rehiyon, kon diin 65 porsiyento nasuhid nga wa makabakuna.
Gikanayon ni DOH national immunization program officer Janis Olavides niadtong Huwebes, Hulyo 17, ang natala nga ihap di hinungdan aron nga modeklara og “measles outbreak” tungod kay nikubos pa gani kini sa 13 porsiyento sa milabay nga tuig.
Ang kasamtangang datos nagpakita nga ang dakbayan sa Davao dunay 444 kompirmado nga mga kaso.
Ang 2019 nga datos nagpakita sab sa pag-ubos sa death cases sa 14, gikan sa milabay nga katuigan nga 33 sa samang panahon.
Gitug-an ni Olavides nga apil sa mga measles hotspots sa dakbayan mao ang mga lugar sa Talomo Central, Talomo North, Buhangin, ug Agdao districts.
“But despite the number, there is no reason to declare a measles outbreaks because it wasn’t able to surpass last year’s figure wherein the city declared a measles outbreak,” pagklaro niya atol sa iSpeak media forum sa City Hall of Davao.
Matud niya nga ang DOH, uban sa City Health Office (CHO), nagpahugot sa ilang vaccination campaign, kon diin ila na karong gilakip ang tanang pampubliko nga tulunghaan.
Apan gikanayon niini nga way “trend” sa mga kaso sa tipdas.
“For as long as there is intensified vaccination, then we will be able to end the transmission of the virus,” pasalig ni Olavides.
Kon diin, dugang pa niya, tinguha sab nila nga ilakip ang mga hamtong sa ilang vaccination program.
Sa pikas bahin, si CHO national immunization program coordinator Eldy Sombilon nagsulti nga tinguha nila nga ma-immunize tanang 250,217 tinun-an, gikan kindergarten hangtud Grade 7, sa siyudad una motapos ang tuig.
Gitin-aw ni Sombilon nga ang kahadlok sa Dengvaxia di na makababag sa mga ginikanan nga di pabakunahan ang ilang mga anak.
Apan iyang gipasalig nga ang buhatan magpadayon sa pagpakusog sa ilang kampanya aron nga hingpit nang mawagtang ang kagaw. (Ralph Lawrence G. Llemit)