NAGMAYA ang Securities and Exchange Commission (SEC) human mipabor kanila ang desisyon sa Regional Trial Court (RTC) Branch 35 sa General Santos City, nga nagbasura sa injunction case nga gipasaka sa Kapa Community Ministry International Inc. kontra kanila.
Sa pahayag nga miguwa, Miyerkules, Hulyo 17, ang SEC nagkanayon nga ang GenSan Regional Trial Court Branch 35 mi-dismiss sa petisyon nga gi-file niadtong Abril 4, labot sa pagpaguwa sa komisyon og cease and desist order (CDO) kontra Kapa tungod sa di otorisado nilang pagbaligya ug pagtanyag og securities.
Ang Kapa nag-atubang sa patong-patong nga kasong kriminal tungod sa pagpangolekta og kuwarta isip investment gikan sa mga nagpa-miyembro kanila nga way pertinenting dokumento.
“Accordingly, the motion is hereby denied and this case is hereby ordered dismissed,” suma ni Presiding Judge Oscar P. Noel, Jr.
Kahinumdoman nga ang Kapa mipasaka og petisyon, Abril 4 ning tuig, human ang SEC mipakanaug og cease and desist order (CDO) kanila.
Pinaagi sa CDO nga gipahamtang sa Kapa, sila gidid-an nga makapamaligya ug makatanyag og securities sa publiko kay wa silay saktong dokumento.
Ang regional trial court sa General Santos City miisyu og writ of preliminary injunction kontra SEC, Abril 10.
Apan gibarugan sa SEC nga walay hurisdiksiyon ang korte sa maong isyu.
Sa Section 179 sa Republic Act No. 11232, o Revised Corporation Code of the Philippines, nagkanayon: “No court below the Court of Appeals shall have jurisdiction to issue restraining order, preliminary injunction, or preliminary mandatory injunction in any case, dispute, or controversy that directly or indirectly interferes with the exercise of powers, duties and responsibilities of the Commission that falls exclusively within its jurisdiction.”
Kahinumdoman nga ang SEC miisyu na og advisory kontra KAPA sukad pa niadtong Marso 2017 tungod sa paghaylo niini sa publiko/miyembro nilang modonar og di moubos sa P10,000 bugti ang 30 porsiyento monthly “blessing” o “love gift” for life, nga way laing himuon kundili ang pag-invest lang ug magpaabot sa payout.
Gidasig sab sa SEC kadtong may reklamo sa KAPA nga moduaw sa ilang buhatan sa SDC Building, Purok 13, Maa Road, Maa, Davao City; o motawag sa (082) 298-2170 ug (082) 298-1893; o mag-email kjpestares@sec.gov.ph.