ADUNA nay resulta sa medical exam sa 19 anyos nga tinun-an nga mipasangil nga gidagit sa mga lalake nga sakay og puti nga van niadtong Hulyo 10, alas 5:00 sa hapon duol sa Foodland Governor Cuenco Avenue sa siyudad sa Sugbo.
Nasuta nga walay nakita nga duga sa lalake nga nabilin sa kinatawo niini ug adunay nakitang samad ang mga doktor nga naalim na sa 'alas 3 ug 9 o’clock position' sa kinatawo sa dalaga nga nagpasabot lang nga nahilabtan na kini ug wala silay nabantayan nga bun-og.
Ang maong resulta sa medical exam ila pang ipa kita sa doctor aron mapasabot kanila unsa kini.
“No evident injury of the perineum at the time of the examination, wala pud nabutang diri nga naay laceration sa kinatawo,” matod ni Police Master Sergeant Jade Omayao.
Bisan pa man niini, dili pa maka hukom ang kapulisan sa Mabolo police station kung tinuod o dili ang pangangkon sa biktima.
Matod ni Police Captain Dexter Basirgo nga wala kini magpasabot nga walay nakita nga samad sa kinatawo o ebedensya sa laing lalake wala na malugos ang biktima sanglit daghang pamaagi nga dili kini mailhan nga hinungdan nga mopalawom sila sa follow up investigation.
Matod niya nga sa ilang gihimong pakisusi walay bisan usa ka tawo sa dapit diin giangkon sa biktima nga didto siya gisignit ug gipugos pagpasakay sa puti nga van. (AYB)