ANG gidaghanon sa tawo mao ang hinungdan nga taas ang kaso sa dengue sa Sugbo diin gihulagway kini sa Department of Health (DOH) nga nag-una sa tanang probinsiya sa nasod.
Apan si DOH 7 regional director Jaime Bernadas nagkanayon nga dili angay maalarma ang publiko ug angay lang nga mangandam kini ug magpakabana usab aron dili magpadayon ang pagsaka sa mga kaso niini.
Base sa labing uwahi nga kaso sa DOH Central Office niabot na sa 5,935 ang kaso nga natala sa Sugbo diin gisundan kini sa lalawigan sa Iloilo diin natala ang 5,327 ka kaso, Negros Occidental nga aduna’y 3,266 ka kaso, Capiz nga 2,590 ang kaso ug Aklan nga 2,095 ang kaso.
Ang maong datus gikan kini Enero karong tuiga hangtod Hulyo 13. Natala usab ang 36 nga patay sa Sugbo, 23 sa Negros Occidental ug 20 sa siyudad sa Iloilo.
Apan kon basehan ang kaso nga natala sa DOH 7 anaa pa lang sila sa 5,611 ug 35 nga patay.
Matod ni Bernadas nga normal nga taas ang kaso sa Sugbo tungod kay kon basehan ang populasyon lukop rehiyon nga anaa na sa 7.4 milyones, 70% niini anaa sa Sugbo o 4.7 milyones.
Dugang sa direktor nga kon ang rehiyon ang basehan anaa lang sa ikalima ang Central Visayas sa nasod sa mga kaso sa dengue.
Base sa trend sa alert and epidemic threshold sa Central Visayas, wala gani kini makalapas sa alert threshold o sa epidemic threshold.
Gibutyag usab ni Dr. Ronald Jarvik Buscato, program coordinator sa Dengue nga aduna’y miscommunication sa Media Relations Unit sa ulohang buhatan niini tungod kay sayop ang datus nga napagawas niini sa publiko.
Dugang ni Buscato nga nagtugma ang datus sa Regional Epidemiology and Surveillance Unit (RESU) ug sa Epidemiology Bureau nila apan lahi ang nigawas sa media.
Sayo ning semanaha dihang nideklarar ang DOH og national dengue alert nunot ning panahon sa tin-uwan diin mosiaw ang sakit nga dengue ug uban pa. (HBL)