TUNGOD sa kahagip-ot sa mga dalan sa Natalio Bacalso Ave., giusab sa Department of Transportation ang alignment o rota sa Bus Rapid Transit (BRT) sa siyudad sa Sugbo.
Inay sa Barangay Bulacao, siyudad sa Sugbo nga maoy naa sa orihinal nga plano, matod ni Presidential Assistant for the Visayas Michael Dino nga sa SRP na magsugod ang BRT.
Sumala ni Dino nga kinahanglan i-realign ang rota gumikan sa kagamay sa N. Bacalso Ave.
“Katong uban nga lisod magbutang og four lanes, dili ang BRT, loop style na lang, tuyok-tuyok lang. Instead of two lanes para sa BRT, one lane lang pero balik-balik siya,” dugang ni Dino sa press briefing sa Regional Convergence Workshop sa Ending Local Communist Armed Conflict (Elcac) niadtong Huwebes, Hulyo 18, sa Oakridge IT Center 2.
Inay sa Natalio Bacalso Ave., adto na paagion ang mga BRT sa SRP padung sa Kapitolyo, sigon ni Kenneth Cobonpue, co-chair sa Regional Development Council (RDC) 7.
Sa ikaduhang alignment, gikan sa Kapitolyo, ang mga BRT anha moagi sa dalan Escario padung sa IT Park.
Sa pag-usab sa rota, dili na molahos sa Talamban area ang mga BRT tungod kay naay monorail nga gi-target nila nga magsugod ang konstruksyon sa unang quarter sa 2020.
Susamang budget nga P16.3 bilyones ang gamiton bisan kon usbon ang mga rota.
Si Cobonpue nidugang nga dili na kinahanglan nga palapdon ang mga karsada sa giusab nga alignment tungod kay napalapdan na kini daan.
Magsugod ang konstruksyon sa mga pasilidad sa proyekto sa dili pa matapos ang 2019 ug magsugod ang partial nga operasyon sa tanang klase sa transportasyon sa 2021.
Ang BRT dunay kinatibuk-ang 250 ka mga bus sa 21 ka stations, diin gipatabang ni Dino si Cobonpue sa paghimo sa desinyo.
Matod ni Cobonpue, dili na kinahanglan nga aprobahan ang giusab nga rota tungod kay ang tibuok proyekto ug ang budget niini kay aprobado na sa DOTr nga maoy naghukom nga usbon ang alignment.
Siya niklaro nga ang iyang pagsupak sa BRT tungod kay dili siya mosugot nga ang upat ka lanes kuhaan og duha ka lanes alang sa BRT diin mosamot na hinuon ang kahuot sa mga sakyanan.