PITO ka elementary students ug laing duha ang kumpirmadong patay sa nahitabong disgrasya sa kadalanan sa Barangay Upper Becerril, lungsod sa Boljoon pasado alas 7 sa buntag, Biyernes, Hulyo 19, 2019.
Gikumpirmar ni Oslob District Hospital Chief Renato Cairo nga aduna pu'y laing 16 ka mga pasahero ang nasamdan.
Matud ni Ruben Niere, information officer sa Munisipyo sa Boljoon, sakay sa mini dumptruck ang mga tinun-an sa Nangka Elementary School, San Antonio Elementary School ug Upper Becerril Elementary School.
Pag-abot sa dulhogon nga bahin sa Upper Becerril, kalit nawad-an ang dumptruck nga gimaneho ni Danilo Niere ug didto nahulog sa pangpang.
Dugang niya nga padung unta nga motambong sa parada ang mga estudyante nga atleta alang sa opening sa district meet.
Ang mga biktima nailhan nga sila si Jerome Niere,11, Mary Ann Filipino, 12, Janna Delos Santos, 12, Clint Isidore Dugang, 10, Victoria Gorozon, 40, Jefferson Jorpo, 11, Alexander Villanueva, 20, Mark Lloyd Mosqueda, 12 ug Riza Mae Viñan, 10.
Ang mga na-injured mao silang Angel Ceciban, 10, Elvie Jean Gorozon, 9, Aga T. Oliveros, 12, Reyan Jhade Bentazal, 10, Lutchie May Romero Rota, 11, Roy Quadero Endrina, 9, Alexes Mitch Alloso, 10, Analyn Legarte, 10, Gracia Mar Denuyo, 10, Thea Joy Felipe, 8, Bernie Niere, 11, Roxan May Endrina, 11, Chan Love Mie Endrina, 27, Imee Clear Rivas, 11 ug Annrose Niere, 11.
Usa sad sa mga gidala sa ospital ang drayber sa maong dump truck, kinsa giaresto usab sa kapulisan.
Nagpasalig si Cebu Province Schools Division Superintendent Rhea Mar Angtud nga buhaton nila ang tanan kuyog ang mga local government units aron matabangan og asikaso ang mga biktima.
"This is very unfortunate. Nobody wants this to happen. Everybody helped para ma-facilitate ang tanan. Mga LGU sa lain-lain nga lungsod, atong mga tawo sa districts diri sige man hatag og updates. God help us," sigon ni Angtud.
Ang Department of Interior and Local Goverment mi-issue og memorandum kaniadto nga nagdumili sa paggamit og dump truck sa paghatod og mga tawo.
Kaniadtong Agusto 2011, 10 ang namatay ug laing 50 ang na-injured human nawagtangan og brake ang trak nga gisakyan sa Barangay Balao, Barili. (AYB, KAL, RTF)