MINNEAPOLIS, Minesota -- Kadaugan ang anaa karon sa alimpatakan ni Jessie Cris “The VIP” Rosales ning iyang ikaduhang pagtaak sa US human napakyas sa permiro.
Si Rosales makigbinukbokay ni Toledo City, Ohio native ug undefeated boxer Tyler McCreary alang sa 8-round non-title fight nga gidalit sa Top Rank Promotions diin isalida sa ESPN+ nga ipahigayon sa MGM National Harbor, Oxon Hill, Maryland State.
Atol sa tinimbangay kaganiha, Hulyo 19, 2019 ang natawo sa Danao City, Cebu apan may dugong taga Talibon, Bohol nga si Rosales mitamak nga adunay 134 lbs. samtang si McCreary adunay 133.2 lbs.
Rosales fight history sa US
Unang misulong sa US si Rosales niadtong Enero 18 ning tuiga diin napildi siya TKO4 ni Olympian boxer Shakur Stevenson atol sa likod-likod sa Manny Pacquiao vs Adrien Broner apan ang winter o katugnaw ang nakaapekto ni Rosales.
Samtang ang away karon nila ni Rosales (22-2-1, 19KO) vs McCreary (15-0-1, 7KO) nga ipahigayon karong Hulyo 19 (Sabado sa buntag RP time) atol nasab sa likod-likod sa Pacquiao batok ni Keith Thurman nga naatol sa summer sa Amerika.
“I’ll try my best, wala nako magproblema sa weather karon sa US,” babat ni Rosales ang kanhi WBA Oceania Featherweight King nga nakontak sa Superbalita Cebu via chat online. (Daniel Quindao Guden, US Correspondent)