Nagubot sa inun-onan

NAGKAGULIYANG ang mga silingan sa usa ka panimalay sa Barangay San Antonio, Agdao District, Davao City human nabiyaan ang giluto nga inun-onan.

Sa blotter nga natala sa Sta. Ana Police Station, gisaysay sa usa ka Elsante Roluna nga nakurat sila dihang misugod na og aso ang kusina sa ilang silingan.

Gilayong girumbo sa mga silingan ang balay nga gigikanan sa aso, diin nasuta nga nabiyaan ang inun-onan nga gitak-ang gamit ang liquefied petroleum gas (LPG).

Gilayong gibuboan og tubig sa mga silingan ang nasunog nga inun-onan dayon gipalong ang siga sa LPG.

Nasayran nga milakaw ang tagbalay kinsa giingong nakalimot kini nga naa siya’y gitak-ang nga inun-onan.

Hinuon giklaro sa kabomberohan nga walay natigayong sunog, diin ang bugtong nasunog ang inun-onan nga isda lang.

Sa maong hitabo, naalarma ang mga silingan gumikan abi nila’g masunog na ang ilang dapit.

Pipila ka mga silingan napungot sa tagbalay human sa hitabo.

Related Stories

No stories found.
SunStar Publishing Inc.
www.sunstar.com.ph