Editoryal: Hagit ni Ahong

Editorial Cartoon by John Gilbert Manantan
Editorial Cartoon by John Gilbert Manantan

LAB-as sa panumdoman sa mga nagsunod sa dagan sa pulitika sa dakbayan sa Lapu-Lapu kon giunsa pagharong ni Mayor Junard “Ahong” Chan ang tanang hagit, gikan sa kampanya sa miaging eleksiyon, hangtod karon ug sa umaabot. Nahinumdom ba kamo nga gikuwestiyon sa usa ka partido ang legalidad sa iyang pag-file sa kandidatura? Apan nakakuha og paborabling hukom gikan sa Commission on Election (Comelec).

Niadtong Mayo 13 ning tuiga, ang katawhan nipili kaniya sa pwesto nga taudtaod nga gihuptan sa pamilyang Radaza, kinsa namatikdan nga dunay dakong kahiubos sa naulahi nga ilang kanhi kaalyo.

Ug nag-atubang na usab og laing ang-ang sa hagit human walay pormal nga turnover sa kanhi administrasyon ni Paz Radaza, kinsa napili nga representate sa bugtong distrito sa dakbayan alang sa Ubos Balay-Balauranan.

Nahimong kontrobersiya dihang si Ahong dili gusto nga si Kong. Radaza nga magpabilin sa iyang opisina sa City Hall apan nagdumili ang naulahi uban sa katarungan nga kini nalatid sa usa ka ordinansa.

Apan si Ahong nakakuha na usab og paborabling opinyon gikan sa Department of Interior and Local Government (DILG) nga siya maoy dunay labawng katungod sa City Hall.

Ang ordinansa bahin sa buhatan sa kongresista gikuwestiyon sa kampo ni Ahong isip “overnight ordinance” ug wala napublikar sa mantalaan.

Dugang isyu ni Ahong mao ang daghang “imports” nga opisyal sa iyang administrasyson. Way salig lumad nga taga Lapu-Lapu? Gipun-an sa iyang bulilyasong posisyon sa pagsupak sa e-jeep, hinuon nakalusot ug nabakwi ra hinuon kini.

Seguradong magpadayon pa ang daghang hagit ni Ahong. Kon dili kini madumala pag-ayo, makaingon kita nga ning sayo pa lang, one term lang ang iyang pagka mayor. Pasidaan lang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph