GIPABUHAGAY sa Sugboanong higante nga si JuneMar Fajardo nga daw sa dili siya makatuo nga nahiluna ang San Miguel Beermen sa ikapitong dapit human sa elimination round nga naghatag kanila og malisod nga misyon sa quarter-finals sa Philippine Basketball Association (PBA) Commissioner’s Cup.
Ang Beermen, nga nagbawon og 5-6 nga rekord, makigharong sa No.2 team North Port Batang Pier sa quarter-finals nga sugdan ugma.
Isip insentibo sa ilang pagsulod sa top two, ang Batang Pier naggunit og twice-to-beat nga bintaha sa quarter-finals.
Bisan sa tungason nilang agianan, malaumon lang gihapon si Fajardo nga makabangon sila.
Nanawagan ang produkto sa University of Cebu (UC) Webmasters sa iyang mga kauban nga mas mokayod, mas magtutok sa ilang kampanya ug ipagawas ang kapabilidad nga nagpahimo kanilang multi-titled squad.
“Basta pag-igihan namin ng husto kasi No. 2 kalaban namin. Di pa naman huli ang lahat. Kaya naman basta maglaro kami ng maayos.” matod ni Fajardo sa Spin.ph.
“Kailangan maging positive lang. Mataas naman yung kumpiyansa namin basta mag-tiwala lang sa team, magtiwala lang sa sistema. Kayang-kaya pa naman.”
Adunay unod ang mga gipanulti sa lumad nga taga lungsod sa Pinamungjan ug nasayod mismo si Batang Pier coach Pido Jarencio.
Wala nagdahom si Jarencio nga ang Beermen mao ang ilang maharong sa quarter-finals sa ilang pagsulod sa top two.
Nahitabo lang kini dihang napilde ang Batang Pier batok sa Meralco Bolts niadtong Hulyo 12 nga gisumpayan og kadaugan sa Talk N’ Text KaTropa batok sa magnolia Ang Batang Pier Hotshots niadtong Hulyo 17 atol sa katapusang adlaw sa elimination round.
“Siyempre dehado kami doon. Defending champion (ng Philippine Cup) makakalaban. Sa dinami-dami ng teams, 12 kami. Isipin mo, sa sampung team, isipin mo ‘yun pa bumagsak sa amin,” matod ni Jarencio.
Ang Batang Pier, nga ninghuman sa eliminasyon bitbit ang 9-2 nga rekord, nakasulod sa top two sa labing unang higayon.
“Champion team ‘yan. Di maalis ‘yun. Tapos ‘yung five-time MVP, si June Mar Fajardo, magaling pa ‘yung import,” dugang ni Jarencio.
“Talagang kailangan super A1 perfect game ang laruin namin sa San Miguel para makalusot.”
Si Jarencio igo na lang sa pagpanghinaot nga mahagit ug madasig ang iyang mga batos sa pagbuntog sa gikahadlukang puwersa sa Beermen.
“Sana ma-motivate ang mga players ng husto na kahit papaano, wag ma-intimidate sa San Miguel,” asoy ni Jarencio. (ESL)