Lancers, Cobras moprotekta sa top 2 spots
MGA duwa karon:
12:30 pm- CIT-U batok USPF (high school)
2:00 pm- CIT-U batokUC (college)
3:30 pm- SWU batok USP-F (college)
5:00 pm- UV batok USJ-R (college)
Pahugtan sa ARQ Builders/University of the Visayas (UV) Green Lancers ug Southwestern University (SWU-Phinma) Cobras ang ilang paggunit sa top two sa ilang pagpakigharong og lainlaing kontra karong hapon sa Cebu Schools Athletic Association Inc. (Cesafi) 2019 Partners Cup college division sa Cebu Coliseum.
Ang Cobras makigharong sa University of Southern Philippines Foundation (USPF) Panthers sa ikatulong duwa samtang ang Green Lancers, nga maoy defending champions, makigsangka sa University of San Jose Recoletos (USJ-R) Jaguars sa main game.
Ang Green Lancers kasamtangang nag-una sa standing dala ang 9-0 nga rekord samtang nagsunod ang Cobras nga adunay 7-2 nga baraha.
Importante ang pagsulod sa top two gumikan kay aduna kini insentibo nga twice-to-beat alang sa semi-finals.
Dili ikalimod nga parehong inilog ang Green Lancers ug Cobras ning mga sangkaa apan dili sila angayang molugak hilabi na kay mas nagkinahanglanan og kadaugan ang ilang tagasatagsa ka kontra.
Ang Panthers ug Jaguars parehong naggunit og 3-6 nga rekord ug nagbahin sa ikalimang luna.
Sa laing bahin, manikaysikay ang Joemang Surplus/University of Cebu (UC) Webmasters kabahin sa ilang tinguha nga makailog og luna sa top two sa ilang pagpakigsangka sa Tough Gear/Cebu Institute of Technology-University (CIT-U) Wildcats sa ikaduhang duwa.
Ang Webmasters kasamtangang naa sa ikatulong dapit dala ang 6-3 nga rekord. Aduna pa sila’y dakong poruhan nga makailog og puwesto sa top two hilabi na kon modaog sila ning sangkaa.
Ang Wildcats nagbitay sa labing ilawom nga dapit dala ang 1-9 nga rekord ug wala na’y poruhan nga makasulod sa finals.
Hinuon labing seguro, mokombati gihapon og maayo ang Wildcats aron mahashasan ang ilang katakos alang sa umaabot nga regular season.
Sa premirong duwa, magsangka ang USPF Baby Panthers ug CITU Wildkittens alang sa usa ka non- bearing game sa high school division. (ESL)