NANAWAGAN si Mandaue City Mayor Jonas Cortes sa mga Mandauehanon nga magtinabangay sa pagsulbad sa problema sa basura.
Matod ni Cortes nga tungod kay wa na siyay laing “choice” sa desisyon sa Dakbayan sa Sugbo sa di na paglabay og basura sa Binaliw landfill, mga lakang sama sa sakto ug simple nga paglahi sa mga basura nga malata ug di malata ang ilang buhaton.
“Nakasabot ko sa concern sa issue sa Cebu City. We are doing our best. Usa sa among gi consider karon is ang collection ug segregation. Dako gihapon ta og problema since we are facing more than 300-tons (garbage) a day,” nagkanayon si Cortes.
Alang kang Cortes, ang pagpabug-at sa mando sa sakto nga segregation makatabang nga mamenosan na ang toneladang basura nga hakuton sa mga garbage truck matag adlaw.
Hinungdan nga gimandoan usab niya ang tanang kawani sa City Hall nga maoy mangulo sa maong paagi diha mismo sulod sa mga opisina ingon man sa tagsa-tagsa ka balay.
“Gani akong gi-advisan ang atong city administrator nga estriktuhon na gyud nga kinahanglan ang segregation sa matag departamento sa dakbayan sa Mandaue nga magsugod gyud magpraktis gyud sa waste segregation, apil na ang mga empleyado nga ang ilang mga balay inspectionon kon ni-comply ba gyud sa waste segregation,” dugang ni Cortes.
Apan matod sa mayor nga kinahanglang susihon una niini ang matag barangay tungod kay dunay uban nga way igong luna kon asa makalabay sa basura. (ANV)