PADAYON ang manhunt operation sa mga sakop sa Regional Mobile Force Battalion 7 inabagan sa mga sundawo sa Ayungon, Negros Oriental sa mga sakop sa New Peoples Army (NPA) nga nipatay sa upat ka mga pulis niadtong Huwebes sa hapon, Hulyo 18.
Ang upat ka mga pulis gipatay sa may sitio Yamot, Barangay Mabato, bukirang dapit sa lungsod sa Ayungon samtang sila gibinaklid sa paggapos. Matod ni Police Colonel Raul Tacaca, hepe sa Negros Oriental Provincial Police Office, nga milusad na karon og imbestigasyon ang kapulisan.
“Nagsagawa na tayo ng manhunt operation sa area and we will be filing also against doon sa mga suspects. May mga identified na kaming mga suspect,” matod ni Tacaca.
Giingong walo ngadto sa napulo ka mga armadong lalake ang ningpara sa upat ka mga pulis nga sakay sa duha ka mga motorsiklo ug giti-onan dayon og tag-as nga kalibre sa mga armas.
Wa na makalihok pa sila si Police Corporal Relebert Beronio, Patrolman Raffy Callo, Patrolman Roel Cabellon ug Patrolman Marquino De Leon.
Giimbargohan dayon sila sa ilang armas ug gipang gapos sa mga sakop sa NPA diin pipila ka gutlo ang milabay gipang pusil sila sa ilang tagsa-tagsa ka ulo.
Usa sa mga residente nitug-an sa kapulisan sa Ayungon nga human gipamusil ang mga pulis, gipang-buttstroke gamit ang M16 armalite rifle samtang ang usa ka lalake mikuha og baseball bat ug gibunal sa ulo sa usa sa mga pulis.
Tungod sa hitabo, ang mga bandera sa tanang mga police station sa Central Visayas naka-half mast.
Giisa usab sa Police Regional Office (PRO) 7 ang alert stattus sa kapulisan batok sa psibleng pagpangatake. (AYB)