Hangtod P120T insurance sa barangay kapitan

HANGTOD sa P120,000 ang matagamtaman nga insurance coverage sa dul-an 2,000 ka mga barangay kapitan sa lalawigan sa Sugbo ubos sa Government Service Insurance System.

Si Gobernador Gwen Garcia nipahibawo niini atol sa general assembly sa mga sakop sa Association of Barangay Council (ABC) sa probinsya niadtong Biyernes, Hulyo 19 sa IC3, siyudad sa Sugbo. Apil sa ma-cover sa insurance sa GSIS ang mga barangay kagawad nga tag P76,000 ang coverage matag usa samtang tag P65,000 sa matag barangay health worker, tanod, day care worker ug barangay animal health aides.

Sa P120,000 nga insurance coverage alang sa mga kapitan, P100,000 ang principal sum, P10,000 ang medical reimbursement ug P10,000 nga burial assistance. Samtang sa P76,000 nga insurance coverage.sa mga barangay kagawad, P60,000 niini alang sa principal sum, P6,000 sa medical reimbursement ug P10,000 sa burial assistance.

Alang sa barangay workers, secretaries ug treasurers nga tag P65,000 ang coverage sa insurance, P50,000 ang principal sum, P5,000 ang medical reimbursement ug tag P10,000 ang burial assistance.

Apil niini ang mga barangay tanod, barangay health workers (BHW), day care workers ug barangay health workers.

Sa general assembly, si Garcia nisaad nga seguradong makadawat og P100,000 nga balor sa mga proyekto o programa ang 962 gikan sa kinatibuk-ang 1,093 ka mga kapitan sa lalawigan, nga nitambong sa kalihokan, alang sa kaayohan sa ilang mga barangay.

Sa samang kalihokan, ang gobernador nikompirmar nga sa unang semana sa Disyembre madawat sa BHW, day care workers, ug barangay nutrition scholars ang P4,000 nga incentives sa Kapitolyo gikan sa P2,400.

Samtang tag P3,000 gikan sa P1,500 nga incentives alang sa mga tanod ug barangay animal health aides.

Gawas sa insurance, si Garcia nisaad sa mga opisyal sa kabarangayan nga ubos sa iyang administrasyon, makabenepisyo ang mga barangay sa rehabilitasyon sa barangay hall, day care ug health centers, di mominos 100 metros ngadto sa 200 metros nga pagsemento sa mga karsada, barangay road opening, Level III water systems, pagpasuga sa mga barangay, pagpabuhat og community stage ug rehabilitasyon sa mga covered courts. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph