9 patay, 34 nangaangol

NAUGKAT: Usa sa mga batang tinun-an giugkat sa mga pulis ug residente gikan sa trak sa lungsod sa Boljoon, Cebu nga 
natumba samtang nagdulhog sa karsada sa Barangay Upper Becerril, Boljoon mga alas 7 sa buntag sa Biyernes, Hulyo 19. Siyam ang nangamatay samtang 16 ang nangaangol. (Tampo ni Michael Dave Amaba)
NAUGKAT: Usa sa mga batang tinun-an giugkat sa mga pulis ug residente gikan sa trak sa lungsod sa Boljoon, Cebu nga natumba samtang nagdulhog sa karsada sa Barangay Upper Becerril, Boljoon mga alas 7 sa buntag sa Biyernes, Hulyo 19. Siyam ang nangamatay samtang 16 ang nangaangol. (Tampo ni Michael Dave Amaba)

SIYAM ang patay samtang 34 ang nangaangol sa duha ka mga managlahing aksidente sa sakyanan sa southern Cebu sa Biyernes sa buntag, Hulyo 19.

Sagad sa mga nangamatay nanagpanuigon og 9 ngadto sa 12 anyos. Unang naaksidente ang usa ka pasaheroang bus nga natumba human mahagbong sa kimba sa Barangay Gawi, lungsod sa Oslob.

Pipila ka mga oras ang nakalabay, natumba usab ang usa ka mini dumptruck sa lungsod sa Boljoon.

Sa aksidente sa Boljoon, gawas sa siyam nga nangamatay, 16 nangaangol, kasagaran mga tinun-an sa tulo ka mga tunghaan sa elementarya.

Mga biktima sakay sa Foton mini dumptruck sa lungsod nga padung unta moapil sa district meet sa Department of Education (DepEd) dihang nahitabo ang disgrasya sa Barangay Upper Upper Becerril pasado alas 7 sa buntag.

Mga biktima kasagaran nagagikan sa Barangay Nangka, San Antonio ug Upper Becerril.

Matod ni Police Master Sergeant Nelson Saquibal, traffic investigator sa Boljoon Police Station, padulong sa lungsod ang mga bata alang sa parade sa district cultural nutrition and sports festival.

Apan pag abot sa dulhogon nga bahin sa karsada, nawad-an og control si Danilo Niere ug nisutoy pagdagan ang dumptruck paingun sa ubos subay sa simentado nga dalan.

Pag-abot sa unahan, natumba kini. Daghan sa mga bata nangalagpot, uban nangapiit sa dump truck.

Pipila kanila ang nangamatay diha-diha dayon samtang ang nagrabehan patay nang nadangat sa Boljoon District Hospital.

Nangamatay:

Jerome Niere, 11

Mary Ann Filipino, 12

Janna Delos Santos, 12

Clint Isidro Dugang, 10

Victoria Gorozon, 40

Jefferson Jorpo, 11

Alexander Villanueva, 20

Mark Lloyd Mosqueda, 12

Riza Mae Vinan.

Nangaangol:

Angel Ceciban, 10

Elvie Jean Gorozon, 9

Aga Oliveros, 12

Reyan Jhade Bentazal , 10

Lutchie May Romeo, 11

Roy Quadero Endrina, 9

Alexes Mitch Alloso, 10

Analyn Legarte, 10

Mark Louie Culanag

Gracia Mae Denuyo, 10

Thea Joy Felipe, 8

Bernie Niere, 11

Roxan May Endrina, 11

Chan Love Mie Endrina, 27

Imee Clear Niere, 11

Annrose Niere,11

Gihulagway ni Saquibal nga 12 kilometros ang gilay-on sa dapit nga nahitaboan gikan sa Poblacion sa Boljoon ug bukiran.

Lakip sa nadalag hospital si Danilo Niere human maangol, apan under arrest.

Mga kasong reckless imprudence resulting in multiple homicide and multiple physical injuries ug damage to government property ang ipasaka batok kaniya.

Nisulti si Danilo kanila nga nawad-an sa brake ang sakyanan, apan ila pang susihon.

“Ang atong finding, lost control gyud siya. Kay kon wala siya ma lost control, wala siya madisgrasya. Kay dili man ta ka confirm kay kon moingon nga nawad-an og brake, mura tag naa sa tupad niya,” matod ni Saquibal.

Si Ruben Niere, information officer sa lungsod, nagkanayon nga ang sakyanan nga gi maneho ni Danilo kondisyon pa ug way daot.

Nagpasalamat siya sa silingan nilang lungsod nga dali nga mitabang kanila sama sa Dalaguete gumikan kay ang ambulansya sa lungsod gi recall ni Gobernador Gwendolyn Garcia.

“May gani intawon kay naay mga rescue vehicle sa Dalaguete. Nya naa pud ang Ginatilan kay kami intawon diri sa Boljoon, wala man mi ambulansya sa pagkakaron kay gi recall man ni Governor Gwen,” matod ni Niere.

Abagahon sa kagamhanan sa lalawigan sa Sugbo ang bayranan sa mga ospital diin gidala ang mga biktima sa pagkaaksidente sa dump truck.

Samtang giklaro ni Garcia ang pagbawi sa Kapitolyo sa ambulansya sa Boljoon kay kabahin sa lakang pag-rationalize sa kagamitan niini.

Ang gobernador nidugang nga prayoridad nila nga ang mga tambalanan ang mogamit sa mga ambulansya, dili ang mga munisipyo.

Ang ambulansya sa Boljoon nga gihatag sa Kapitolyo niadtong Disyembre 2017 tua gipagamit sa Juan B. Dosado Memorial Hospital, district hospital sa lungsod sa Sogod.

Giangkon ni Boljoon Mayor Merlou Derama nga nasayod siya sa memorandum sa Department of Interior and Local Government (DILG) sa Central Visayas nga nagdili sa pagpagamit sa open-type nga mga sakyanan sama sa dump truck sa paghakot o pagkuha og mga tawo.

“O bitaw pero ang mga maestra man gud nihangyo namo ngari ana. Unya usual naman pud na nato sige gamit diri,” ingon sa mayor.

Matod niya, ang nadisgrasya nga dump truck bag-o pa dihang napalit niadtong 2016 ug kini maoy kanunay gamiton sa tanang mga kalihokan sa Department of Education.

Niadtong Agusto 19, 2011, si kanhi DILG 7 Director Pedro Noval niluwat og memorandum nga nagmando sa mga mayor sa kalungsuran ug siyudad sa Central Visayas nga dili itugot ang pagpagamit sa ilang open type nga mga sakyanan sama sa dump trucks sa pagpasakay og mga pasahero libre man o naay bayad.

Laing aksidente

Moabot 18 ka pasahero ang naangol human nahagbong ang usa ka bus sa kimba sa dalan sa Barangay Gawi, lungsod sa Oslob alas 3:45 sa Biyernes sa kaadlawon, Hulyo 19.

Ang drayber sa bus (body number 8002), giila nga si Lozano Jesus Lunday, 43, taga Barangay Talisay, Santader, Cebu.

Basi sa pakisusi ni Police Corporal Judel Rivera, si Lunday niingon nga aduna siyay nakasugat nga sakyanan. Nasuwawan siya pag-ayo sa suga ug nakabig niya padulong sa tuo ang manubela.

Wa na kini niya mabawi nga niresulta sa iyang pagkabangga ngadto sa waiting shed ug nahagbong sa kimba.

Ang mga naangol daling gipangdala sa Oslob District Hospital pinaagi sa ambulansiya. Upat sa mga pasahero nga naangol mga menor de edad, nga naglakip sa 2-anyos nga bata. (AYB, SCG, Myla Tabio ug Mary Cathleen Sumayang-CNU Comm Interns)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph