GIILANG leader sa usa ka drug group nga teenager pa nga naglihok sa Metro Cebu nasikop sa buy bust operation sa Drug Enforcement Group nga gipangulohan ni Police Lieutenant Colonel Glenn Mayam ug Abellana police station nga gipangulohan ni Police Major Eduardo Sanchez.
Mga alas 8:30 sa Biyernes sa gabii, Hulyo 19, gihimo ang buy bust operation sa Brgy. Cogon Ramos, Siyudad sa Sugbo.
Nasikop si Rico Baldesamos Rubi, 19, taga 256 A. Lopez street, Brgy. Labangon ning dakbayan.
Unang nakuha ang usa ka pakete nga maoy gipalit sa pulis nga nagpatuo nga kustomer.
Apan sa dihang gidakop na siya, nakuha pa ang 10 ka dakong putos ug usa ka extra large pack nga gituohang shabu nga gisulod sa plastic bag.
Ang drugas motimbang og duha ka kilo nga dunay Dangerous Drugs Board (DDB) value nga P13,600,000.
Tulo ka buwan ang pagpaniid sa mga sakop sa DEG ug Abellana police station kang Rico tungod kay sila naglisod pag-transact kay di makig-atubang kon di kaila.
Matod ni Mayam nga ang amahan ni Rico nga nabilanggo sa Cebu City Jail maoy adunay direktang contact sa mga big time drug lord sa kaulohan.
Siya lang ang modawat sa supply ug mobaligya sa iyang mga drug player nga dinagko usab ang ma-dispose sa gawas.
“Actually, ang father niya is nasa Cebu City Jail karon. Siyay distributor sa koan sa iyang father, siya ang leader diri sa gawas,” matod ni Mayam.
Sa gamay pa si Rico ug wa pa madakpi ang iyang amahan, siya na ang sugoon sa pagbaligya sa illegal nga drugas.
Hangtod nga nasikop ni sa milabayng mga tuig ug nagpadayon gihapon ang ilang illegal nga negusyo.
Makabaligyag si Rico og tag usa ka kilo nga shabu matag semana depende sa supply nga moabot kaniya, matod ni Mayam.
Aduna na siyay gipang tug-an nga mga ngalan nga mga sakop nga maoy kanunay niya nga baligyaan sa butang nga maoy target sa sunod nila nga anti drug operation.
Ang grupo ni Rico usa sa mga dagkong drug group nga nag lihok sa siyudad sa Sugbo.
Igsuon sa opisyal
Igsuon sa konsehal sa barangay Tabunok, Syudad sa Talisay usa sa tulo nga nasikop sa buy bust operation sa kapulisan.
Giila ang dinakpan nga si Alvin Cabañero, 45, subject sa maong operasyon. Si Alvin ang igsuon ni barangay konsehal Ican Cabañero.
Gisusi pa sa kapulisan ang report nga trabahanti sa Talisay City hall usab si Cabañero.
Nasikop siya alas 12:30 Sabado sa tungang gabii, Hulyo 20, sa sitio Neighborhood, Barangay Tabunok.
Lakip sa nasikop giila nga sila Joselito Tapic, 38, ug Joebert Cabriana, 31.
Ang Talisay City Police Station nakadawat og taho gikan sa usa ka concerned citizen kalabot sa giingon nga rampant nga pagpamaligya og ilegal nga drugas sa maong lugar ug gitudlo si Cabañero.
Si Police Captain Nazarino Emia, deputy chief sa Talisay City Police Station, nibutyag nga gipaubos nila sa pipila ka higayon nga surveillance ang suspek.
Nasuta nga tinuod ang taho hinungdan gihimo ang operasyon.
Gibana-bana nga mobalor ang ilegal nga drugas nga nakuha og P70,448.