Igsuon sa barangay konsehal sikop sa buy-bust

IGSUON sa konsehal sa Barangay Tabunok, Dakbayan sa Talisay ang usa sa tulo ka nasikop sa buy-bust operation sa kapulisan.

Giila ang dinakpan nga si Alvin Cabañero, 45, kinsa mao'y subject sa operasyon. Si Alvin ang igsuon ni Barangay Konsehal Ican Cabañero.

Gisusi pa usab karon sa kapulisan ang report nga trabahante sa Talisay City Hall si Cabañero.

Nasikop si Cabañero alas 12:30 sa buntag, Hulyo 20, 2019 sa Sitio Neighborhood, Barangay Tabunok.

Lakip sa nasikop giila sila si Joselito Tapic, 38, ug Joebert Cabriana, 31.

Ang Talisay City Police Station ang nakadawat og taho gikan sa usa ka concerned citizen kalabot sa giingon nga rampant nga pagpamaligya og ilegal nga drugas sa maong lugar, ug gitudlo mao si Cabañero.

Si Police Captain Nazarino Emia, deputy chief sa Talisay City Police Station, nibutyag nga gipaubos nila sa pipila ka higayon nga surviellance ang suspetsado ug sa dihang nasuta nga tinuod hinungdan gihimo ang operasyon.

Nasakmit sa operatiba gikan sa mga dinakpan ang 18 ka gagmay nga pinakete ug duha ka medium pack sa gidudahan nga shabu.

Gibana-bana nga mobalor ang maong ilegal nga drugas nga nakuha og P70,448.

Ang mga dinakpan anaa karon sa Talisay Detention Cell ug gikatakdang pasakaan sa mga tukmang kaso karong Lunes, Hulyo 22. (Superbalita Cebu)