LAS VEGAS, Nevada -- Boxing champions Gerry “Fearless” Peñalosa, Nonito "The Filipino Flash” Donaire Jr., Jerwin “Pretty Boy” Ancajas, Rodel “Batang Mandaue” Mayol ug John Riel “Quadro Alas” Casimero pulos mituo nga modaug si Pinoy boxing icon Manny Pacquiao batok Keith Thurman.
Si Peñalosa nga na-interview sa Superbalita Cebu atol sa post weigh-in, nagkanayon nga sayong tapuson ni Pacquiao si Thurman.
“Tingale first round or second round ra kay mao na akong gipustahan aron makabawi ko sa pusta,” pahiyom nga saysay ni Peñalosa.
“Tan-aw nako kon dili ma-knockout si Thurman sa late rounds, daog si Manny by unanimous decision,” pulong ni WBA Super champion Nonito Donaire Jr. atol sa pakighinabi ning tigbalita.
“Sa tingin ko manalo si Manny (Pacquiao) sa mga 6th or 7th rounds laban kay Keith Thurman,” analysis ni reigning IBF Super Flyweight Jerwin Ancajas.
“Panalo dito si Senador Manny (Pacquiao). Magaling, malakas pa rin at may kumpyansa sa sarili,” yagyag ni former WBC Lightweight champion Rodel Mayol,
“Para nako 6th, 7th or 8th rounds TKO molampos pagdaug si sir Manny Pacquiao kontra ni Thurman, maayo ra sa estorya apan wala sa buhat,” sugilon ni reigning WBO interim Bantamweight Champion John Riel Casimero.
Samtang si Mommy Dionesia Pacquiao nagkanayon sa Superbalita Cebu nga wala siya malisang ni Thurman og gitambagan niya iyang anak nga paspasa pagpili si Thurman.
Mitambong sa boxing weigh-in naglakip nila ni Mommy Dionesia (inahan), Jinky (asawa), Jimuel (amahan). Nitambong sab sila si Nimuel, Michael (anak) ug Janet Zamora (kaluha ni Jinky). (Daniel Quindao Guden, US Correspondent)