NAGKANAYON si Nonito Donaire Jr. nga mapugos siya pagpangita og laing away kon dili madayon ang iyang bantamweight tournament finals match batok kang Naoya Inoue.
Gipasabot ni Donaire nga napungot na siya nga taodtaod nang wala’y kumonikasyon ang mga nag-organisar sa World Boxing Super Series bantamweight tournament.
“We want communication, because we do want to fight,” matod ni Donaire sa interbyu sa www.boxingscene.com.
“We do want to make things happen. But if that doesn’t work, then we’re willing to move on and make it happen some other time.”
Nagkanayon si Donaire nga sa orihinal nga plano, ang finals bout ipahigayon sa Hunyo o karong buwana apan hangtod karon, wala pa’y klaro kon kanus-a.
Si Donaire maoy bantamweight champion sa World Boxing Association (WBA) samtang si Inoue sa International Boxing Federation (IBF).
“My promoter has talked to them, and they said they’ll get back to him,” batbat ni Donaire.
“But they haven’t. The last time that we heard from them was my wife’s birthday, June 21st . . . So, that’s pretty much it. We haven’t heard anything.”
Giangkon ni Donaire nga anugonan siya kon dili madayon ang ilang away ni Inoue apan kinahanglan niyang mangita og laing away. (ESL)