MGA duwa karon:
4:30 pm- Alaska batok Talk N’ Text
6:45 pm- San Miguel batok NorthPort
Mosuway dayon pagsulod sa semi-finals ang top two teams Talk N’ Text KaTropa ug NorthPort Batang Pier sa ilang pagpakigbatok og lainlaing kontra sugod karong hapon sa quarter-finals sa Philippine Basketball Association (PBA) Commissioner’s Cup sa Araneta Coliseum.
Ang KaTropa, nga maoy No.1 team human sa elimination round dala ang 10-1 nga rekord, makigbatok sa No. 8 Alaska Aces sa premirong duwa.
Ang Batang Pier, nga No. 2 squad, makigsangka sa No.7 San Miguel Beermen sa main game.
Isip insentibo sa ilang pagkasulod sa top two, ang KaTropa ug Batang Pier parehong naggunit og twice-to-beat nga bintaha ning mga sangkaa.
Dako kini nga bintaha apan labing seguro, dili bastabasta magpapukan ang Aces ug Beermen, nga pareho nang nakasakmit sa talagsaong Grandslam title.
Sa laing bahin, ang five-time MVP nga si San Miguel center JuneMar Fajardo maoy napiling PBA Press Corps-Cignal Player of the Week awardee.
Ang Sugbuanong higanti maoy nag-agak sa Beermen nga makaposte og kadaugan sa katapusang duha ka mga tahas sa Beermen sa elimination round.
Si Fajardo, kinsa produkto sa University of Cebu (UC) Webmasters ug lumad nga taga lungsod sa Pinamungajan, Cebu, nag-average og 22.5 puntos ug 14.5 rebounds sa kadaugan sa Beermen batok sa Phoenix Fuel Masters, 128-108, ug Rain or Shine Elasto Painters, 89-87. (ESL)