LAS Vegas, Nevada – Nagkahiusa ang pagtuo sa Pinoyng mga boksidor nga kasamtangan ug kanhi world champions nga nahinabi sa Superbalita Cebu nga modaog si Manny Pacquiao batok kang Keith Thurman pinaagi sa knockout karong udto sa MGM Grand Garden sa Las Vegas, USA.
Ang mga nakuhaan og komentaryo ning mantalaan mao sila si Gerry “Fearless” Peñalosa, Nonito “The Filipino Flash” Donaire Jr, Jerwin “Pretty Boy” Ancajas, Rodel “Batang Mandaue” Mayol ug John Riel “Quadro Alas” Casimero.
“Tingali first round or second round ra kay mao na akong gipustahan aron makabawi ko sa pusta,” pahiyom nga saysay ni Peñalosa, kanhi two-time world champion.
“Tan-aw nako kon dili ma-knockout si Thurman sa late rounds, modaog si Manny by unanimous decision,” pulong ni Donaire, World Boxing Association (WBA) super champion.
“Sa tingin ko manalo si sir Manny (Pacquiao) sa 6th or 7th round laban kay Keith Thurman,” batbat ni Ancajas, International Boxing Federation (IBF) super flyweight king.
“Panalo dito si Senador Manny (Pacquiao) magaling, malakas pa rin at may kumpyansa sa sarili,” yagyag ni Mayol.
“Para nako 6th, 7th or 8th round TKO molampos pagdaug si sir Manny Pacquiao kontra ni Thurman, kinsa maayo ra sa estorya apan wala sa buhat,” sugilon ni Casimero, WBO interim bantamweight champion John Riel Casimero.
Sa laing bahin, ang inahan ni Pacquiao nga mas nailang si Mommy Dionesia nagkanayon nga iyang giawhag ang iyang anak nga humanon og sayo ang away pinaagi sa pag-knockout kang Thurman.
Nidugang si Mommy D nga wala siya mahadlok sa mga pasiatab ni Thurman ug dako ang iyang pagsalig nga molampos ang iyang anak ning awaya. (Daniel Quindao Guden, US Correspondent )