DILI lang usa, duha o tulo, kondili lima ka okasyon ang giusa og saulog sa pamilya ni Mary Grace Zabala-Oberes niadtong Hunyo 22, 2019.
Sa maong adlaw, dungan nga gisaulog ang tulo ka kasumaran sa adlaw nga natawhan nila ni John Louie Zabala, manghod ni Grace; Seann Peattre, iyang anak ug Clarinda Oberes-Villareal, iyang bayaw nga babaye kun maguwang sa iyang bana nga si Sony, 39.
Ang ilang pamilya nisaulog sa ika-27 nga birthday ni Louie, ika-6 nga birthday ni Seann ug ika-44 birthday ni Clarinda.
Gawas sa birthday sa tulo, gihimo usab ang blessing sa bag-ong balay nila ni Grace nga nahimutangan sa lower Barangay Tunghaan, lungsod sa Minglanilla, habagatang Sugbo.
Base sa salida sa television network nga Paw Patrol sa Nic kelodeon ang tema sa birthday party diin daghang mga bata ang nanambong.
Dungan sa birthday party, gisaulog usab nila ang pagka-regular sa trabaho ni Louie isip librarian sa De La Salle University sa kaulohan.
Matod ni Grace, naandan sa ilang pamilya nga ipaagi sa salosalo sa gawas sa ilang balay o mangaligo sa dagat o swimming pool sa birthday ni Seann o Louie. Karong tuiga, nagpalahi sila diin giandaman og birthday party ang bata sa ilang bag-ong balay dungan sa house blessing.
Si Padre Sherwin Ferrater, vice president for academics sa St. Joseph Academy sa siyudad sa Mandaue, ang nagbendisyon sa bag-ong balay nila ni Grace.
Ang 36 anyos nga ginang nipaambit nga wa siya magdahom nga mabuntis dayon ni Seann niadtong Oktubre 2012 human siya mapaubos sa whole body scan nga may ubos nga dose sa radiation niadtong Hunyo 2012.
Si Grace unang na-diagnose nga may thyroid cancer. Siya gipaubos sa radiation niadtong Hunyo 2011 ug naoperahan sa iyang thyroid niadtong Mayo 28, 2011.
Karon, ang ginang kay cancer free na.
“Feeling so happy and blessed (ko) kay wala ko nag-expect na mabuntis dayon. Since si Sony every two years ra mouli. So, grabe gyud akong kalipay kay gitagaan dayon ko lain blessing. Unya it turns out na boy. So, pares na dayon,” pamulong ni Grace.
Ang iyang bana, usa ka overseas Filipino worker (OFW), nga sa matag duha ka tuig lang makauli sa ilaha.
Si Seann may maguwang nga babaye nga si Maryshan Therese Oberes nga 8 anyos na karon. (SCG)