SECTIONS
Sunday, August 18, 2019
SUPERBALITA CEBU

Vallena: Suporta kang Tumulak

Pedal

DAGHAN ang mikisi-kisi sa mga taga Talisay tungod sa estriktong pagpatuman sa no helmet, no ride sa motor sukad sa pag-asumer ni Joy Tumulak isip hepe sa City of Talisay Traffic Operation Development Authority (CCTODA). Bisan lang mopalit og sud-an, kinahanglan pa kunong mag-helmet kon magmotor.

Guilty man gani ko ini usahay, pero kahibawo ko nga ang pagsul-ob sa helmet is for our own safety. Atoa rang kaluwasan.

Proven na man gud nga sa mga aksidente, basta di lang grabe ang impact, ang helmet makaluwas. Sa Vietnam lang gani, diin grabe kadaghan ang tigmotorsiklo sama sa Pilipinas, nikunhod og 70 porsyento ang gidaghanon sa mga nangamatay sa mga aksidente sa two-wheeled vehicles.

Sagad sa mga aksidente sa sakyanan naglambigit og mga motorsiklo ug scooter. Sa matag adlaw dinhi sa Dakbayan sa Sugbo, maghilak kon di moabot og 10 ang mga aksidente sa two-wheeled nga sakyanan. Nasayod si Tumulak niini dihang siya pa ang nagtimon sa Cebu City Traffic Operations and Management.

Busa, bisan mopalit ka ra og sud-an sa unahan, basta mogawas ka sa karsada, mas maayong manalipod ka sa kaugalingon gikan sa makamatay nga kadaut. Kay ang aksidente di baya mahibaw-an.

Gawas pa, dunay nasudnong balaud niini. Busa, angay lang kining ipatuman ug tumanon kay alang kini sa imong kaluwasan.

Ipatuman

Maayo kay gipatuman ni Tumulak ang balaud nga nagdili sa mga sakyanan nga anha mohunong sa lane nga lik-unon nga makababag sa nagsunod nga mga sakyanan. Usa ni sa mga hinungdan sa paghuot sa trapiko.

Gikinahanglan nga ipatuman ang balaud sa karsada aron makuhaan ang mga badlungon nga driver. Kon pasagdan lang ang mga violator, ang problema sa trapiko mosamot kay nagkadaghan man usab ang mga sakyanan sa dan. Magkadaghan ang mga sakyanan, magkadaghan ang mga badlungon.

Gitul-id lang ni Tumulak ang mga sayop nga sa kadugayan napasagdan ug gituohan nang sakto. He is just putting order in the roads of Talisay.

Swerte si Mayor Samsam Gullas nga nakuha niya ang serbisyo ni Tumulak nga nakaagi og trainings sa abroad sa traffic management dihang siya pa ang nagdumala sa CCTO.

E BIKES

Panakpon ang mga electric bikes nga nagdagan sa kadalanan karon. Unsaon man sab, gigamit na kining pasaheroan sa uban. Naa na guy nanagan sa dan Colon ug ubang mga karsada sa Dakbayan sa Sugbo.

Sakto man sab nang samtang sayo pa, pakgangon na ni sila. Apan mas maayong di iapil nang pribado kay gamit kaayo ni sa mga traffic jam. Sa Guangzhou, China, ang ilang gi-ban ang motorsiklo ug scooter. Ang biseklita ug e-bikes ang ilang gi-encourage didto. Uyon ko sa ilang polisiya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph