SUPERBALITA CEBU

Diola: Nagtimotimo

Mao diay

Binasi sa Genesis 18:1-10; Salmo 15; Taga-Colosas 1:24-28; Lucas 10:38-42

SAGAD sa panahon sa hikay ang tagtungod, ilabina ang naghikay, dili makigdungan og kaon sa mga dinapit. Moingon dayon sila nga “nagtimotimo” na ko. Sa ato pa, samtang sila galuto sige na sad silag tilawtilaw sa linuto. Busog na kuno sila. Apan, sa tinuoray, di pa gyod sila busog kay tilawtilaw ra man. Ang pag-abi-abi sa mga dinapit maoy tinuyoan.

“Apan si Maria nagkapuliki tungod sa daghang bulohaton,” mabasa nato sa ebanghelyo. Mingduaw man god kanila si Jesus, usa ka higala sa managsuon nga si Marta, Maria, ug Lazaro ug si Maria “nagalingkod sa tiilan sa Ginoo ug nagapaminaw sa iyang pulong”. Mibagotbot si Marta ug ang tubag ni Jesus ilado kaayo: “Marta, Marta, nabalaka ug nahasol kaayo ka sa daghang mga butang, apan usa ra gayod ka butang ang gikinahanglan. Sa pagkatinuod si Maria mipili sa labing maayong bahin ug dili kini makuha gikan kaniya”.

Daghan tang makat-onan niini. Importante ang pag-abi-abi apan ang paghatag og personal nga pagtagad mismo sa dinapit labing mahinungdanon kaysa ubang bulohaton gawas sa pagtagad sa tawo mismo nga dinapit. Sa tinuoray lang may mga maghikay nga mopahawa na lang ang dinapit ug wala gyod sila magkahimamatay sa mga dinapit. Nabusog ang dinapit apan gutom lang gihapon kay walay gyod matagad hinuon.

Mapalagman pa gyod nato ang atong pamalandong. Kon si Jesus ang dinapit, sa tinuoray siya maoy unang nagdapit kanato. Siya ang nagsugod sa pag-abi-abi ug dili kita. Mahimo tang daghang himuon sa atong pagkatumutuo apan wala gihapon nato hatagig higayon ang Ginoo sa pakighimamat ug pagtudlo kanato,

Kining pagkamaabiabihon mabasa sa libro sa Genesis diin giabiabi ni Abraham ang tulo ka mga dumuduong. Gihugasan ilang mga tiil ug gipakaon. Ang pag-abi-abi dako kaayo nga sugo sa mga nagpuyo sa luga nga awaaw kay mahimong mamatay ang tawo nga dili matagad.

May lain pa gyod nga anggulo gikan sa sulat ngadto sa mga tags-Colosas nga nagkanayon nga “ginapuno” ni Pablo diha sa iyang pag-antos ang “kulang sa mga kalisdanan ni Cristo alang sa iyang lawas nga mao ang Simbahan”. Niining tungora espirituhanon ang pag-abi-abi ni Pablo kang Jesus. Matag Kristohanon gitawag sa paghatag sa maong samang pag-abi-abi. Tungod kay ang mga sumusuonod ni Jesus nagpuyo latas sa katuigan ug latas sa kanasoran, kita ang mohingpit sa pag-antos ni Jesus latas sa katuigan ug kanasoran.

Gihatagan ba natog labawng bili ang pagtimotimo o ang pagpakigsalo sa Dios?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph