SECTIONS
Sunday, August 25, 2019
SUPERBALITA CEBU

Mongaya: Cebu Customs ‘limpyo’

Panahom

KON wala ko masayop pagbasa sa listahan sa mga kasong pangurakot nila, walay kaso nga nahitabo sa Sugbo sa 64 ka mga empleyado sa Bureau of Customs nga gipa-resign ni Presidente Rodrigo Roa Duterte.

Kon di sila mo-resign, pasakahan sila og kasong administratibo diha sa Ombudsman ug ang mga piskal mohangyo dayon sa ilang suspension.

Ang 64 gipatawag ni Presidente Duterte sa Malakanyang ug ang maong tigum gitambongan sab ni Secretary Carlos Dominguez III, Presidential Spokesman Sal Panelo, Executive Secretary Salvador Medialdea, ug Presidential Anti-Corruption Commission (PACC) Dante Jimenez.

Hinuon, naay kanhi hepe sa Enforcement and Secuity Service (ESS) kun Customs police ug kanhi sakop sa assessment sa Cebu port nga naapil sa listahan apan ang kaso nga nakapa-apil kanila sa listahan sa gipa-resign nahitabo sa laing puwerto.

Naay mga Customs collectors nga nalambigit apan walay labot si kanhi Cebu District Collector Elvira Cruz, nga giilisan ni acting district collector Charlito Mendoza sayo karong Hulyo.

Drama man gud kaayo ang maong pagpakana-og kang Collector Cruz kay giabagan man kini og mga armadong sakop sa Coast Guard aron siguradong di makasulod sa Customs building kini si Cruz.

Hinuon, naa na may kasong gisang-at si Collector Cruz kabahin niini busa di na nato hisgutan ang mga detalye.

Bisan pa man, ang malampusong turnover sa district collector dinhi sa Sugbo nasundan dayon sa revamp sa mga collector sa ubang mga puwerto.

Dako sab nga pangutana mao, maayo bang mobangga ang usa ka district collector kang Customs Commissioner Rey Leonardo Borja Guerrero nga Army chief ug chief of staff sa Armed Forces of the Philippines (AFP)?

Tingale, ang lig-on nga makasugakod batok sa kasuko sa mga kanhi heneral mao si broadcaster Erwin Tulfo nga gidungog karon nga maoy moilis kang Secretary Martin Andanar sa Presidential Communications Operations Office (PCOO).

Balik sa atong obserbasyon nga walay nalambigit og kasong corruption nga nahitabo dinhi sa atua, sakto ba nga makaingon kita nga limpyo ang Bureau of Customs sa Sugbo?

Kadtong buhi pa ang akong amahan nga nag-cover sab sa bureau, nagsigi na siya og ingon nga ang collection ug corruption inversely proportional. The more the collection, the lesser the corruption. Unya, dugay-dugay na man gyud nga nagsigi sa pag-igo bisan pa man sa kataas sa target collection ang mga district collectors sa Sugbo.

Mendoza

Wala pa ko personal nga nahimamat kini si acting district collector Mendoza. Apan suma sa akong nabantayan, usa kini ka opisyal nga samtang di hilig og publicity, dunay klarong agi nga makita dayon kon itandi sa miagi.

Ang mga opisina nga kanhi mapuno og mga nag-loiter nga mga empleyado ug mga personero nahawan na. Di kaayo dako nga positibong kausaban apan dunay nakabantay, sir. (@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph