SA DIHANG adunay 13 ka mga tinun-an nga pa-ingon unta sa usa ka field trip ang nangamatay human mahagbong ang ilang gisakyan nga bus didto sa Rizal Province niadtong Pebrero 2017, ang Department of Education (DepEd) mipagawas og istriktong guidelines alang sa mga out of school activities. Kini aron paglikay sa mga disgrasya nga maapil pa ang mga tinun-an.
Apil sa guidelines mao ang mandatory insurance sa mga tinun-an nga mosalmot sa mga kalihukan, istriktohon ang pag-inspeksiyon sa mga sakyanan nga gamiton ug boluntaryo lang ang pagsalmot sa mga tinun-an. Unahon gyud ang siguridad ug proteksiyon sa mga tinun-an.
Ang Department of Interior and Local Government (DILG) mipagawas usab og guidelines alang sa mga local government units nga nagdilli paggamot sa ilang mga dump trucks nga kasakyan sa mga tawo labi pa sa mga estudyante. Kini nunot usab sa mga grabeng panghitabo nga naglambigit og mga kinabuhi sa mga tawo tungod sa disgrasya.
Niadtong miaging Biyernes, walo ka mga estudyante ug usa ka inahan ang namatay human mahagbong ang mini-dumptruck nga ilang gisakyan didto sa barangay Becceril sa lungsod sa Boljoon. Ang mga tinun-an gikan sa Nangka ug San Antonio Elementary School kuyog ang pipila ka mga ginikanan paingon sa poblacion aron motambong og kalihukan nga gipatawag sa mga opisyal sa DepEd. Nawad-an og preno ang maong mini dumptruck nga gipanag-iya sa LGU sa Boljoon, hinungdan nga gibangga na lang kini sa driver sa bungtod ug nga mikaliring ang mini-dumptruck.
Pangutana? Dili ba kasupakan sa DepEd ug DILG memorandum ang gihimo sa mga DepED officials nga gipasakay ang maong mga bata sa mini-dumptruck? Kinsa man ang angay manubag ning nahitabo? Dili usab nato mabasol ang mga school officials sa Nangka ug San Antonio nga nanghangyo sa LGU sa Boljoon nga mogamit sa mini dumptruck sa lungsod kay wala may lain silang kasakyan. Alangan man og ilang palakwon ang mga tinun-an anang 20 kilometros nga gilay-on. Naa pod kaha sa insaktong kondisyon ang maong sakyanan? (bobbgnalzaro@gmail.com)