SUNODSUNOD ang mga aksidente sa kadalanan sa southern Cebu niadtong Biyernes. Siyam ka mga kinabuhi ang nakutlo, sagad mga bata pa intawon kaayo.
Di mahibaw-an ang mga aksidente nga mahitabo. Lain usab nga vehicular accident ang nahitabo sa may General Maxilom avenue, diin usa ang namatay ug gikatahong duha ang kritikal.
Daghan ang mga vehicular accident dinhi sa Sugbo nga hayan mapugngan unta kon duna pay igong lakang ang kagamhanan. Pipila ka mga lakang ang mahimo unta kaayo.
Una, kining pagpalapad sa karsada, labina sa main highways padung sa north ug south. Sagad sa mga aksidente naa mahitabo sa hagip-ot kaayong bahin sa mga karsada nga maoy agian sa mga bus ug uban pang dagkong mga sakyanan. Kon gipalapdan pa kining mga karsada, dako ang posibilidad nga malikayan ang mga disgrasya.
Lain pang mahimo mao ang pagbutang og speed limiter sa pampublikong mga sakyanan, sama sa mga bus ug uban pa. Daghan sa mga aksidente nga gihimong katarungan sa mga driver ang pagkapalpak sa brake.
Kon kusog ra kaayo ang dagan sa sakyanan nga dako, dako ang kahigayunan sa braking system nga mopalyar kay sobra na kini sa kapasidad niini.
Ipatuman ang mga lagda sa trapiko ug hugot nga idili ang parking sa mga national highway. Kay karon, daghan ning mga sakyanan nga naa sa highway gi-park.
Mga bar i-monitor ug kadtong mag-drive susihon di ba hubog.
Dako kaayo og papel ang Land Transportation Office, Department of Public Works and Highways (DPWH) ug local government unit (LGU) niining mao nga mga lakang. Kon kining tanan pagabuhaton, dako kaayo ang kahigayunan nga mas luwas ang atoang karsada sa mga disgrasya. Mominos usab ang mga kinabuhi nga makalas.