KAGAMHANAN sa Dakbayan sa Lapu-Lapu gipahinumduman sa Commission on Audit (COA) sa pag-uli sa P30.1 milyones nga pundo nga gikan sa Priority Development Assistance Fund (PDAF) sa nagkadaiyang mga magbabalaod.
Apan ang buhatan sa City Treasurer nipahibawo nga ila nang giuli ang P23.2 milyones nga kabahin sa gipaningil nga pundo niadtong Marso 26, 2019.
“Unexpended balances of Priority Development Assistance Fund (PDAF) totalling P30.1 million were not returned to the National Government through the Bureau of the Treasury contrary to COA Memorandum dated March 26, 2014 and as provided in the Supreme Court (SC) decision, declaring the PDAF unconstitutional,” tipik sa natala sa COA report sa 2018.
Wa hinuon matala sa report ang mga proyekto nga gitagan-an alang sa maong pundo.
Si kanhi kongresista Arturo Radaza maoy adunay labing dako nga pundo nga natampo alang sa Dakbayan sa Lapu-Lapu nga moabot og P24.7 milyones atol sa iyang termino niadtong 2010 – 2013.
Laing Sugboanong kongresista Nerissa Soon-Ruiz, 6th District nibubo sab og pundo sa Lapu-Lapu nga mokabat sa P344,881.44.
Si City Accountant Helen Dungog mipahibawo nga niadtong Marso ning tuiga, giuli na ngadto sa Bureau of Treasury ang P23.3M samtang ang nahibiling balanse nga P7 milyones kasamtangang gigamit sa mga beneficiary sa scholarship program sa Dakbayan.
Ang beneficiaries mga college student nga nagtungha sa nagkadaiyang unibersidad sa dakbayan sa Sugbo. (FVQ)