GIAWHAG karon sa City Health Office (CHO) ang Dabawenyos nga batasanon ang 4 o’ clock habit, luyo sa pagtaas sa kaso sa dengue sa Davao City.
Giingon sa otoridad nga luyo sa ihap sa kaso, na-monitor gihapon kini sa hintungdang ahensya diha sa pagtubag sa mga butang nga gikinahanglan aron di na kini motaas.
“It is everyone’s responsibility to make sure their homes are kept clean at all times. We are urging everyone to practice the 4 o’ clock habit,” sulti ni Dr. Josephine Villafuerte, ang CHO chief medical officer, kinsa nagpasabot sab nga ang dengue virus, gikan sa pinaakan sa lamok sa hayag pa, nga gitawag kining Aedes aegypti ug Aedes albopictus nga lamok.
Maayo nalang kay ang lokal nga kagamhanan sa siyudad sa Davao dunay paspas nga pag-askyon sa mga butang nga makatabang sa pagbatok niini.
Sama nalang sa Ancillary Services Unit (ASU) diin maoy natahasan sa pagpanglimpyo sa mga kanal ug sa ubang dapit nga posibleng giitlogan sa lamok nga nagdala og dengue.
“They can contact ASU and then it will be ASU that will call us to do herbicide or misting,” she said. “We urge everyone to dry up and clean up their surroundings and destroy the breeding grounds for the dengue-causing mosquito,” dugang sa opisyal.
Ning panahona, opisyal na nga gideklara sa Philippine Atmospheric, Geophysical, and Astronomical Services Administration (Pagasa) nga ting-ulan na, buot pasabot kung ting-ulan modaghan ang mga lugar nga mapundohan og tubig nga maoy posibleng itloganan sa mga lamok.
Batasanon gayod ang pagpanglimpyo sa palibot kay bugtong kaalam ug kakugi lamang sa katawhan ang makabatok niini.
Busa suportahan nato ang kampanya sa lokal nga kagamhanan ning siyudad aron di na madugangan ang ihap sa mga nangamatay nga biktima sa dengue.