1 patay, 7 angol sa bangga

CEBU (Updated with correction) -- Usa ang patay ug laing pito ka mga tawo ang nangaangol human banggai sa usa ka sports utility vehicle (SUV) ang usa ka PUJ Sabado sa kaadlawon, Hulyo 20, 2019, sa General Maxilom avenue, Dakbayan sa Sugbo.

Ang driver sa SUV giingong nakainom kay nanimahong ilimnon nga makahubog.

Namatay sa pagbangga sa SUV ang driver sa PUJ, samtang samdan ang pito ka mga tawo, lima niini mga pasahero sa PUJ samtang ang duha nag-angkasay sa usa ka motorsiklo nga naangin sa aksidente.

Nagusbat ug di na mahitsura ang PUJ nga gimaneho ni Carlo Singcol Gahator, 24, taga San Jose, Occidental Mindoro, human nabanggaan sa SUV nga gimaneho ni Angelo Rey Gurrea, 21.

Sakay sa PUJ jeep ang lima ka mga pasahero nga nakaangkon og mga samad ug bali sa lawas.

Angol usab ang duha ka mga tawo nga nag-angkasay sa motorsiklo nga naigo sa PUJ nga nalagpot sa kakusog sa impact.

Matod ni Police Chief Master Sergeant Antonio Jay Pizarras nga sa ilang pasiunang imbestigasyon, unang nakasaghid si Gurrea sa awto nga gimaneho ni John Dale Alivia, 39.

Si Gurrea giingong ni-overtake kang Alivia sa mao nga dalan sa University of San Carlos (USC) North campus.

Tungod sa gikusgon sa iyang pagpadagan, nibangga kini sa PUJ nga gimaneho ni Gahator nga gikan sa usa ka gasolinahan nagpatubil.

Tungod sa kakusog sa impact, naigo sa nalagpot nga PUJ ang usa ka motorsiklo.

Sa unang pakisusi sa kapulisan, giingong nakainom si Gurrea kay nanimaho pa kini og ilimnong makahubog.

Patay na nga nadangat sa tambalanan si Gahator, samtang daling gidala sa Cebu City Medical Center (CCMC) ug pribadong tambalanan ang mga angol.

Kasamtangang gitanggong si Gurrea sa Parian Police Station alang sa kaso nga ipasaka batok kaniya.

Base sa record sa City Traffic Operations Office (CCTO), naisyuhan og ticket si Gahator niadtong Biyernes, Hulyo 19, 2019, tungod sa depektibo nga headlight sa iyang PUJ.

***

(CORRECTION: Sukwahi sa taho nga nigawas ning mantalaan, si Alivia, usa sa mga biktima sa bangga, di maoy nakabangga.)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph