PAMPANGA

Garcia: Lwa ning lumbe at ning tula (Tears of sorrow and joy)

Kapisik

TATALAGUSGUS bagya-bagya

king awang a salamin,

kabang pupulisan na ing ambun.

Teterak la ring kapisik king sanap-sanapan.

Ing pasakdalang lumbe lalto--

abung bigang kulut manangis la,

agnan ding lwa mung maging uran.

Teterak asna kabangis at katimawa

king madikut a marangle.

Kabang paniglon ing kapagpagmasusyan,

ding agimat yuyuyu la king salu mu.

Anting banal a pusung,

ing lupa mu makatalukbung ya kabang kikyak ka,

agnan ning pasibayung pangabalag mu lwa.

Makatiman anting bingut, marine ka,

mengari king mekataladwa na mebalu

a mepata nang bina king uma.

Kabang ing paslu tataglus ya busal ning pusu,

kabang ding aldo ning uran magmula—

ninung makapibata king tagulele na

agnan ding marimlang tutulung lwa na?

Papampan na ing dulum nang tambing

mengaring libung alino ning bulan.

Makananu nang lakwan ing paralaya?

Alang peka-makapangalingwan king pinanari

ampat malalaus ne king panyatang na.

Ing galingaldo mu mipapampanan ya king kelang-malit

agnan ding lwa mung tatalagusgus pasibayu.

~ “Lwang Mababalag Pasibayu”--Miguel Serrano, 07.18.19

***

Lwa—tanda ning lungkut, mwa, kelang pagasa o sakit lub—parating kayagnan na ning tangis o kyak. Malagad mung ating manangis a alang tutulung lwa karing mata da. Lakwas masakit ing manangis alang lwang tutulu. Makaskup salu at makapangaplas pusu. Nung wari keng misasalbag a papakbung—ing lwa ya ing milulwal kareng sablang kaplas a makatipun karing kekatamung pilubluban.

At kabud tumulu na ing lwa—lumwalas ta salu—miyalilan ing sablang kaplas king kapasnawan a e asali keng salapi. Nung kumkuman tamu ing sakit lub, mengari yang purtil a matatdas king danum a lapo-lapo at e na na agyung ipagyu pa ning sugatang pusu ing sablang kaligaligan a makadatuk kaya.

Inya pin daig la reng mangatwa kareng anak, lalu na reng bingut, keng pamanibala king sakit lub uling deng bingut ala lang nanu mang ampatan a kamarinayan at kumyak na lang alang pakyalam kareng manakit o makarandam karela bang milwal ing panamdaman dang e mayap. Ibugnus da ngan iti king masikan a kyak a pagaga agyang mangaklingan la pa deng sablang makarandam at mangalwal la mata deng sablang manakit.

Deng mangatwa, susupilan da ing panangis at daralan da namu keng pamag-Facebook o pamag-Twitter ing sakit da lub. Deng aliwa, makirandam lang alang patanat a tigtigan keng Spotify o Souncloud kabang deng aliwa mag-YouTube na la mu o manalbe pelikulang patingapun—ba’lang makapangalingwan karing sablang sigalut a babalut keng pusu da’t isipan.

Ating mag-PC o Phone games namu gagawan inya mangaslak na la mata keng pangababad keng gagawan da ba’lamung milako lumbe o nanu mang e mayap a kapanamdaman. E la bisang tumulu lwa at pakit kareng aliwa a ila malungkut la o masakit la lub o pusu.

Makanyan man, e bala namung lawa tanda na ning kaplas lub. Ating awsan dang lwa ning tula o “tears of joy.” Malilyari iti neng ing tau labis-labis ya ligaya, tula at lapo-lapo ne ligaya’t tula. Ninu mong e pa kinyak at tinulu lwa ning tula? Mekad itamu ngan delanan ta na ngan iti. Manyaman. Mayumu. Masaya. Maligaya.

Inya lumapo king pilubluban nung kinasna ne iti at tumulung anting ulu king salung mikakaluku at yang maging paralan bang dimla ne panamdaman ing sadyang mibubwang lugud.

Paburen mung tumulu ing lwa mu, abe lalu na nung lwa ning lugud king Apung Ginung kakataskatasan. Lwa ning lugud—alang kasingyumu.

***

Dake Talabaldugan:

inggit – (palagyu) kasutilan, panga-palpakamwa. English: irascibility, proneness to anger. Alimbawa king pamangamit: “Parati ne inggit ing bapa kui manibat inyang milako ya keng pipangawan palang uling ita mu ing balu nang kapanintunan.”

ingil – (palagyu) pamaningil, isding, ungul, maynang batingulngul. English: growl, snarl, whine (as of dogs and foxes). Alimbawa king pamangamit: “Kabukas ya ingil ing sese nang kwang Budyu uling palang ating makaket a maragul a leypan keng bitis na.”

ingít – (palagyu) langitngit, ngikngik. English: creaking or grating sound due to friction. Alimbawa king pamangamit: “Bala da kanu reng mekitudtud a dalo ibat Menila ating manangis kabukas uling darandaman da ing ingit da reng kwayan.”

ipil – (palagyu) ipil-ipil, tanaman keng dalan, masukal o ilang. English: Leucaena glauca: small tree 2-6 meters in height, likewise known as santaelena, used mainly for firewood and reforestation and as cover crop and for exterminating bad weeds like cogon. Alimbawa king pamangamit: “Gagamitan da la reng ipil keng pamangawang uling at keng pamaglutu uling dakal lang tutubu nu man karin.”

ipis – (palagyu) gagamitan keng sugalan o pyalung mu naman. English: playing cards. Alimbawa king pamangamit: “Karen mung ipis manakitan neng maragul ing pisan ku uling byasa yang manula kapamilatan da reti.”

***

GAWING MEKALINGWAN KARING KAPAMPANGAN!

“Sutil” ampong “berat”. Adwang amanung miyawig kabaldugan dapot atin la pa mu ring ditak a pamiyaliwa. Ing “sutil” magagamit ya karing palpasumami, palpakamwa at palpa-bugnut a taung e na anak. Malyari ya naming iyambing ing “bugasuk” nung mangabaldugan yang palpapali buntuk at oneng abe ya ing pabisu-bisu. Ing “berat” karen yang bingut angga na kareng daragul a anak, dapot e ya manayun gamitan kareng matwa na. Deng berat ila ring ating sumpung at nung susumpung la—saguli lang mimwa, masumami at mabugnut. Malagd

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph