GIHULAGWAY sa Cebu City Police Office (CCPO) nga nag malinawon ang tibuok dakbayan sa Sugbo atol sa away ni Senator Manny Pacquiao batok ni Keith Thurman sa Las Vegas, Nevada, USA.
Matod ni Police Major Randy Caballes ang hepe sa Operation branch sa CCPO nga wala silay natala nga bisan unsa nga krimen nga nahitabo.
Mingaw ang mga nag-unang kadalanan sa dakbayan nga magpamatuod nga naka tutok ang mga tawo sa telebisyon sa away sa pambansang kamao.
Apan mga ala 1:30 sa hapon usa ka 60 anyos ang giatake sa kasingkasing human na desisyonan nga midaog si Pacquiao.
Giila ang biktima nga si Margarito Gasquejo alyas Garitoy 60, nga taga Block 1 barangay Sawang Calero.
Nag tan-aw siya sa libre nga pay-per-view sa Barangay Hall sa Barangay Sawang Calero apan kalit lang kini nga giatake.
Gidali siya pagdala sa Cebu City Medical Center pinaagi ni kapitan Sergio Ocaña.
“Mao rana ang incident nga nahitabo from 11 a.m. to 1 p.m., kada duwa aning senator Manny zero crime man ni permi sa Cebu City,” matod ni Caballes.
Gi-monitor karon sa CCPO human sa duwa ni Pacquiao ang downtown area sa dakbayan diin modagsa na usab ang daghang mga tawo.