KARONG adlawa ang ika-upat nga State of the Nation Address (SONA) sa atong Presidente Rodrigo Roa Duterte (PRRD).
Apan sama sa naandan bisan pa sa kadaghan nga accomplishment nga nahimo sa presidente, duna pa gihapo’y hut-ong sa katawhan nga bisan kon nakadawat na sila og daghang grasya niining administrasyona apan mao pa’y mangulo sa pagsinggit-singgit nga pakana-ugon ang pangulo.
Kung inyong namatikda sukad sa paglingkod ni PRRD sa pagka presidente, problema sa mga kabus mao'y iyang gi-una. Una, wala na’y binulan nga bayranan ang mga nanag-iya og mga basakan.
Ikaduha, free tuition sa tanang mga pobre nga estudyante sa mga koliheyo ug mga unibersidad, sa ikatulo, libre nga hospital obligation sa mga pobre nga pasyente sa mga tambalanan nga iya sa atong gobyerno.
Ika-upat, libre nga pabalay sa mga pobre nga Pilipino, ug ang ika-lima pagpang-apud apod og mga yuta niadtong mga mag-uuma nga gustong adunay kaugalingong luna nga ma-ugmad.
Diha sa labor sector, gitapos na ang Endo (end of contract) mga trabahante nga contractual nga wala'y security of tenure kasado na karon sumala ni Labor Secretary Silvestre Bebot Bello III.
Sa mga Social Security System (SSS) pensioners human sa P1,000 nga gihatag niya niadtong tuig 2017, karong sunod tuig 2020 ihatag na usab ang laing P1,000 sigon sa iyang gisaad, karong bag-o ug 20 porsiyento na usab ang diskwento sa tanang mga estudyante sa mga transportation, restaurant barko, ug eroplano.
Daghan pa ang mga benepisyo nga gihatag ubos niining administrasyon ni PRRD, apan kon adto ka maminaw sa mga oposisyon labi na sa mga militante, wala kuno’y nahimo ang administrasyong Duterte, ngano?
Atong namatikdan nga kon pwede pa lamang, tanan nilang panginahanglanon gobyerno na ang mutobag kon mahimo pa lang, gobyerno na’y maghungit sa ila kon mokaon ang tanan, pulos gobyerno nalang.
Dapat gyud nga adunay balaod nga mugnaon ang mga magbabalaod nga disiplinahon ang mga hiwi tang batasan. Wala ba mo’y namatikdan? Kinsa kadtong mga tawo nga wala'y gikatampo nga buhis sa atong panudlanan, mao kanunay ang magsigig paghot sa atong mga kadalanan? Mao'y kusog mangayo ug musaway, kon di ihatag, higdaan ang mga kadalanan.
Kitang tinuod nga nag-obserba mao'y nakakita sa pipila ka mga kalampusan nga nahimo sa administrasyon ni PRRD, dili man siya perpekto apan, problema sa mga pobre mao'y iyang gi-una.
Mahitungod sa isyu sa atong sobereniya, di kini basta basta magpagawas dayon og desisyon ang atong presidente, kay kamahayan sa ulahi ang atong mahiaguman.
Giyera? Sayon kaayo kanang litukon pero kon mahitabo, ambot asa kita puniton. Ang giyera karon lahi sa ikaduhang gubat sa kalibutan, ania na kita sa panahon sa modernong kagamitan sa gubat.
Ania na kita sa nuclear season, weapon of mass destruction mao'y gamiton sa China, patay hastang mga ok-ok ug mga sagbot ug mga tanum.
Karon kamong mga oposisyon gusto mo'g giyera?
Paminawon ta unya ang ika-upat nga SONA sa atong presidente, para atong mahibaw-an kon unsay iyang plano sa Pilipinas sa nahibiling tulo ka tuig sa iyang administrasyon.