MATANAO, Davao del Sur -- Napuno sa kaguol ug kabalaka ang gibati sa mga nakapay-in sa Rigen Wellness 2.0 Marketing human nasirado na ang buhatan niini lakip na ang St. Bedenedict Hospital.
Kapungot ang gibati sa mga miapil sa maong investment scheme kinsa nagpaabot sa ilang kasuko pinaagi sa pag-post sa social media.
Wa masayod si Elliot, 49-anyos, kun makuha pa niya ang 100-mil pesos nga gipay-in sa kompanya niadtong Mayo 2.
Naglibog sab si Glory, 23-anyos, kun asa makuha ang iyang pay-out human nakadawat og taho nga nakakuha na ang uban niini.
Aduna sab mga gipangbaligya na lang ang ilang acknowledgement receipt (AR) aron mauli ang ilang kapital kay wa masayod kun makadawat pa sila sa giingong tubo sa kumpanya.
Ang netizen nga si Vivien Zen, mibutyag nga sa Abril 29 unta dapat iyang pay-out apan hangtud karon wa pa siya makadawat niini.
Apan, nanghunaw ang kumpanya sa Matanao human gipahibawo sa ilang post nga mihimo sila og demand letter alang sa Central Office aron makuha na ang pay-out sa tanang nagpailawom kanila.
“Wala mi nitago, wala mi kwarta nga gidala. Kay tanan collection dugay ra sa Central Office nahatag,” asoy sa kumpanya.
Nanghinaot ang tanang miapil sa maong investment scheme nga makuha nila og balik ang ilang kwarta sa madaliang panahon sanglit ang uban inutang pa nila ug aduna’y porsyento.