COTABATO CITY -- Nadakpan sa awtoridad ang managtiayon nga gikonsiderang mga High Value Target (HVT) sa pagpamaligya og ginadiling drugas alas 4:30 sa hapon niadtong Sabado sa siyudad sa Cotabato.
Giila ang mga suspek nga sila Albeihi Kambali Biang, 29-anyos ug iyang asawa nga si Ladyrose Bansawan Biang, 27-anyos, mga molupyo sa Santan Street Urban Poor Village, Barangay Rosary Heights 11, Cotabato City.
Gibutyag ni Philippine Drug Enforcement Agency (PDEA-BARMM) Regional Director Juvinal Azurin nga ilang gironda ang balay sa magtiayon uban ang kapulisan base sa search warrant nga gi-isyu sa korte.
Narekober sa raiding team gikan sa mga suspek ang 10 gramos nga gituohang shabu nga dunay kantidad nga 50 mil pesos, sling bag nga dunay sulod nga 20 mil pesos isip boodle money, pitaka nga dunay sulod nga mga IDs ug duha ka cellphones.
Gikanayon ni Azurin nga dugay na nilang gipanid-an ang magtiayon nga nalambigit sa illegal drug trade sa dakbayan.
Gipasalamatan sab ni Cotabato City Mayor Attorney Cynthia Guiani Sayadi ang PDEA-BARMM sa walay puas nilang operasyon sa siyudad batok sa mga tawo nga nalambigit sa ilegal nga druga.
Sa kasamtangan, gibalhog na ang mga suspek sa Costudial Facility sa PDEA-BARMM ug gitakda nga pasakaan sa kasong adunay kalapasan sa Republic Act 9165 kon Comprehensive Dangerous Drugs Act of 2002 didto sa korte.