JOHN TAM. YBAÑEZ
Gun-ob, Lapu-Lapu City, Cebu
MILUTA pa sa nawong ni Noel ang kapungot tungod sa hataas nilang panag-away ni Jocelyn kagabii. Karon, kon wa pa lang siyay appointment sa aplikante nga rekomendado sa iyang sekretarya, di lang unta siya mosulod sa opisina. Bag-o lang silang nag-estoryahay.
“Manang Elvie,” naandan na niya ang maong tawag sukad pa niadtong bata pa siya ug giuban-uban sa kompaniya sa iyang amahan, “moanha ba karon kadtong girekomendar mong aplikante?”
“Moari, Sir. Natrapik lang seguro. Ngano man diay?” tubag sa sekretarya.
“Aw, wa man. Sige, kon moabot gani, ingna lang nga paabot-abuton kadiyot.”
Mibalik siya sa iyang lawak kay ingon sa di siya makasud-ong og dugay sa nagkayamukat nga sala, nagpasad nga mga kutson ug buak nga plorera ug pigurin tungod sa away nila ni Jocelyn kagabii. Iya man god ning gibalibaran dihang nangayo og kuwarta nga ipuhunan sa ‘casino’ nga kanunay lang niining gipilde.
Makapila na niya kini tambagi nga moundang na sa maong bisyo, apan di gyud patuo. Nakabati ra ba siyang nag-flirting si Jocelyn sa usa ka inilang playboy nga sportsman sulod sa pipila na ka gabii sa suki niining ‘casino.’ Kini sumala pa sa iyang mga higala sa gym nga maoy iyang paga-ensayohan matag Sabado ug Domingo. Unya nahinumdom siya sa dayag nga pagsupak sa iyang inahan kang Jocelyn nga gikaila sa iyang igsuon sa diskohan hangtod nga gipaila kaniya ug nahimo niyang hinigugma.
“Maayong babaye ba ang tan-aw mo anang bisan asa mo dad-a mokuyog lang dayon?” ni Mama Jovie niya nga igo lang niyang gipalapos sa pikas dawunggan.
Giagni siya ni Jocelyn nga magtipon lang una sila. Gidala niya ang dalaga sa giabangan niyang apartment dihang siya na ang nagdumala sa negusyo sa iyang amahan nga namatay sa stroke luyo sa pagsupak sa iyang inahan. Wa malilong kang Mama niya nga siya ‘chick boy.’
Niadtong diha pa siya sa uwahing tuig sa kolehiyo aksidenteng nakapamabdos si Noel kang Judith nga nangasera sa balay-paabangan sa iyang lola. Dili tantong guwapa si Judith apan puti kini og kutis nga usa sa iyang weakness. Wa man usab hinuon mamugos ang ginikanan sa dalaga nga iya kining pakaslan. Giareglo ra kini sa iyang mama ug lola.
Miligid ang lima ka tuig ug wala na siyay balita bahin kang Judith ug sa ilang anak. Wa usab kini mosuway pagkontak kaniya.
MIYUKO si Elvie, ang edarang sekretarya nga nakakita kaniyang miabot. Nangatahuran kini kaniya: “Good morning, Sir! Anaa na siya sa sulod, Sir.” Iyang nasbtan nga ang aplikante maoy gipasabot sa kalihim ug tua na kini sulod sa iyang opisina.
Hinay nga giliso ni Noel ang seradora ug dungan sa pagbukas sa pultahan mao usay paglingi sa babaye nga naglingkod sa silya atubangan sa iyang lamesa. Apan managsama silang naamang. Milabhag sa ilang panagway ang kahikugang.
“No-Noel...?”
“What a small world, ha, Judith!” ni Noel nga nagpahiyom. “Ikaw ba ang mo-apply?”
“Oo, Sir,” mitahod kaniya ang babaye. “Nagkinahanglan man god kog trabaho aron ikabuhi kang Wel-Wel, anak nako!”
“Anak nato. Wel-Wel diay ang iyang ngan?”
“Iya nang angga. Noel usab ang iyang ngan. Liwat kaayo nimo.”
Nahibaw-an ni Noel nga dalaga pa si Judith ug sa iyang hunahuna mihadla ang hulagway sa usa ka malipayon ug malinawong pamilya nga wa gayud niya matagamtami sa kiliran ni Jocelyn, kinsa wala makahatag kaniyag anak. (KATAPUSAN)