GITATAW ni San Miguel Beermen pointguard Chris Ross nga wala siya magdumot kang national coach Yeng Guiao ug ang iyang kaandam nga motabang sa Gilas Pilipinas isip usa ka practice player maoy makapamatuod niini.
Matod ni Ross nga andam siyang motabang ni Guiao ug sa national team ug iyang gipasalig nga dili makahatag og kahasol ang grabe nilang panag-away ni Guiao kaniadto.
Gipasabot ni Ross nga angayan nang ilubong sa kalimot kon unsa may nahitabo kaniadto.
“There is no bad blood with me and him,” pagtino Ross sa Spin,ph. “He is a competitor and has his team’s back. And I’m a competitor. It stays in the court and in that game.”
Ang panagbikil nila ni Ross ug Guiao nahitabo sa Philippine Basketball Association (PBA) Philippine Cup sa miaging tuig.
Gipasanginlan ni Ross si Guiao nga nibuhi og racist remark batok kaniya hinungdan nga nagkalalis sila.
Gipanghimakak ni Guiao ang pasangil ni Ross, hinuon iyang giangkon nga nag-dirty finger siya ngadto sa usa sa labing maayong pointguards sa PBA.
Aron ipakita nga gilubong na niya sa kalimot ang maong hitabo, mibulontaryo si Ross nga motabang ni Guiao alang sa preparasyon Gilas Pilipinas.
“Just to give a helping hand. Sometimes I see that they only have eight or nine players practicing,” matod ni Ross.
Ang Gilas Pilipinas magpraktisan sa Meralco Gym nga duol ra sa gipuy-an ni Ross.
“I live really near Meralco so I figured I could be an extra body,” pasabot ni Ross. (ESL)