MOLARGA og balik sa Japan sa sunod buwan si Southeast Asian Games gold medalist Mary Joy Tabal aron didto ipadayon ang iyang hugot nga pagbansaybansay alang sa matag duha ka mga tuig nga kompetisyon.
“(My trip back to Japan) is in the middle of August,” matod ni Tabal, kinsa bag-uhay lang nagsaulog sa iyang ika-30 ka mga tuig nga adlawng natawhan pinaagi sa usa ka fun run ug pagpanghatag og mga regalo ngadto sa grassroots kids sa Sugbo.
Si Tabal, kinsa usa ka Olympian, maoy defending gold medalist sa women’s 42-kilometer event sa SEA Games.
Tinguha niyang depensaan ang titulo atubangan sa iyang mga kababayan. Ang 2019 SEA Games ipahigayon dinhi sa nasod karong Nobiyembre 30 hangtod Disyembre 11.
Ang mga duwa kombatihon sa Clark, Metro Manila, Subic Bay ug uban pang mga dapit sa Luzon.
Magpadayon ang training ni Tabal hangtod karong Nobiyembre, mga usa ka semana sa dili pa magsugod ang kompetisyon.
Kini maoy ikaduhang higayon ning tuig nga mag-training si Tabal sa Japan.
Ang SEA Games salmutan og kapin sa 9,000 ka mga atleta gikan sa 11 ka mga nasod. (RSC)